ബെംഗളൂരു: ബെംഗളൂരു-എറണാകുളം വന്ദേഭാരത് എക്സ്പ്രസ് ട്രെയിന്‍ പ്രധാനമന്ത്രി നരേന്ദ്രമോദി വാരാണസിയിൽനിന്ന് ഓൺലൈനായി ഫ്ളാഗ്‌ ഓഫ് ചെയ്യും. ബനാറസ്-ഖജുരാഹോ, ലഖ്‌നൗ-സഹാരൻപൂർ, ഫിറോസ്പൂർ-ഡൽഹി എന്നിവ അടക്കം നാല് വന്ദേഭാരത് ട്രെയിനുകളാണ് ഇന്ന് പ്രധാനമന്ത്രി ഇന്ന് ഫ്ലാഗ് ഓഫ് ചെയ്യുന്നത്.
ബെംഗളൂരു-എറണാകുളം വന്ദേഭാരത് ട്രെയിനിന്റെ പതിവു സർവീസ് നവംബർ 11-ന് ആരംഭിക്കുമെന്ന് ദക്ഷിണ-പശ്ചിമ റെയിൽവേ അറിയിച്ചു. ആകെ 11 സ്റ്റേഷനുകളില്‍ മാത്രമാണ് ട്രെയിന്‍ നിര്‍ത്തുക. എറണാകുളം, തൃശൂര്‍, ഷൊര്‍ണൂര്‍, പാലക്കാട്, പൊദന്നൂര്‍, കോയമ്പത്തൂര്‍, തിരുപ്പൂര്‍, ഈറോഡ്, സേലം, ജോലാര്‍പേട്ടൈ, കൃഷ്ണരാജപുരം, കെഎസ്ആര്‍ ബെംഗളൂരു എന്നിങ്ങനെയാണ് ട്രെയിന്‍ കടന്നുപോകുന്ന സ്‌റ്റോപ്പുകള്‍. 9 മണിക്കൂർ കൊണ്ട് 608 കിലോമീറ്റർ പിന്നിടും. കൊച്ചിയിൽ നിന്ന് ഉച്ചയ്ക്ക് പുറപ്പെടുന്ന രീതിയിലാണ് സമയം ക്രമീകരിച്ചിരിക്കുന്നത്. ഉച്ചയ്ക്ക് 2.20ന് എറണാകുളത്തു നിന്ന് പുറപ്പെട്ട് രാത്രി 11 മണിക്ക് ബെംഗളൂരു സിറ്റിയിലെത്തുമെന്നാണ് അറിയിപ്പ്. ബെംഗളൂരുവിൽ നിന്ന് പുലർച്ചെ 5.10ന് പുറപ്പെട്ട് ഉച്ചയ്ക്ക് 1.50ന് എറണാകുളത്തുമെത്തും.
എട്ട് കോച്ചുകളടങ്ങിയതാണ് പുതിയ വന്ദേഭാരത്. നാല് മോട്ടോർ കാർ, ഒരു എക്സിക്യുട്ടീവ് ക്ലാസ് കോച്ച്, ഒരു ട്രെയ്‌ലർ കോച്ച്, രണ്ട് ഡ്രൈവിങ് ട്രെയ്‌ലർ കോച്ച് എന്നിവയുണ്ടാകും. ബെംഗളൂരുവിൽനിന്ന് എറണാകുളംവരെ ചെയർകാറിൽ അടിസ്ഥാനനിരക്ക് 1095 രൂപയാണ്. എക്സിക്യുട്ടീവ് ക്ലാസിന് 2289 രൂപ. ഇതിനൊപ്പം കാറ്ററിങ് ചാർജ്, റിസർവേഷൻ ഫീ, സപ്ലിമെന്ററി ചാർജ്, ജിഎസ്ടി എന്നിവകൂടി വരും.
ഇന്ന് രാവിലെ എട്ടിന് എറണാകുളത്തുനിന്ന്‌ ആരംഭിക്കുന്ന ഉദ്ഘാടന സ്പെഷ്യൽ സർവീസ് (06652 എറണാകുളം-കെഎസ്ആർ ബെംഗളൂരു) വൈകീട്ട് 5.50-ന് ബെംഗളൂരുവിലെത്തും. ഉദ്ഘാടന ദിവസ സ്പെഷ്യൽ സർവീസിന് ബാംഗ്ലൂർ കേരള സമാജത്തിന്റെ നേതൃത്വത്തിൽ വരവേൽപ്പ് നൽകും. ഇന്ന് വൈകിട്ട് 4.30-ന് കെആർപുരത്ത് വരവേൽപ്പ് നൽകുമെന്ന് സമാജം പ്രസിഡന്റ് എം.ഹനീഫ്, ജനറൽ സെക്രട്ടറി റെജികുമാർ എന്നിവർ അറിയിച്ചു.
SUMMARY: Bengaluru-Ernakulam Vande Bharat will arrive today; regular service from 11
