നമ്മ മെട്രോയില്‍ ക്യുആർ കോഡ് അധിഷ്ഠിത പാസില്‍ പരിധിയില്ലായാത്ര; പുതിയ സംവിധാനം ഇന്ന് മുതല്‍ 

ബെംഗളൂരു: യാത്രക്കാരുടെ സൗകര്യം വർദ്ധിപ്പിക്കുന്നതിനും ഡിജിറ്റൽ ടിക്കറ്റിംഗ് പ്രോത്സാഹിപ്പിക്കുന്നതിന്റെ ഭാഗമായും ക്യുആർ കോഡ് അടിസ്ഥാനമാക്കിയുള്ള ആനുകാലിക യാത്രാ പാസുകൾ ഏര്‍പ്പെടുത്തി ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ). മൊബൈൽ ആപ്പിലെ ക്യുആർ കോഡ് പാസുകൾ ഉപയോഗിച്ച് നമ്മ മെട്രോയിൽ പരിധിയില്ലാതെ യാത്ര ചെയ്യാവുന്ന ഒന്ന്, മൂന്ന്, അഞ്ച് ദിവസത്തേക്കുള്ള പാസുകളാണ് ഏർപ്പെടുത്തുന്നത്. ഇന്നു മുതൽ നമ്മ മെട്രോ ആപ്പിൽ പുതിയ പാസുകൾ ലഭ്യമാകുമെന്ന് ബിഎംആർസിഎൽ അറിയിച്ചു

ഒരു ദിവസത്തെ പാസിന് 250 രൂപ, 3 ദിവസത്തെ പാസിന് 550 രൂപ, 5 ദിവസത്തെ പാസിന് 850 രൂപ എന്നിങ്ങനെയാണ് നിരക്ക്. ക്യുആർ കോഡ് പാസിന് സെക്യൂരിറ്റി ഡിപ്പോസിറ്റ് ആവശ്യമില്ല.

ഒരു ദിവസം ഒട്ടേറെ തവണ മെട്രോയിൽ യാത്ര ചെയ്യേണ്ടി വരുന്നവർക്കാണ് പാസുകൾ പ്രയോജനപ്പെടുക. സമയം ലാഭിക്കുന്നതിനും കാർഡ് ഇഷ്യൂ ചെയ്യുന്നതിനും റീഫണ്ടുകൾക്കുമായുള്ള കൗണ്ടറുകളിലെ ക്യൂ ഒഴിവാക്കുന്നതിനുമായി  മൊബൈൽ ക്യുആർ അധിഷ്ഠിത പാസുകളിലേക്ക് മാറാൻ യാത്രക്കാരോട് ബിഎംആർസിഎൽ അഭ്യർത്ഥിച്ചു. വരും ദിവസങ്ങളിൽ മറ്റ് ആപ്പുകളിലും ക്യു ആർ കോഡ് അധിഷ്ഠിത പാസ് സൗകര്യം ഏർപ്പെടുത്തുമെന്ന് ബിഎംആർസിഎൽ അറിയിച്ചു.
SUMMARY: QR code based pass unlimited travel on Namma Metro; New system from today