ബർമിങാം: ലോക ലെജൻഡ്സ് ചാമ്പ്യൻഷിപ്പിൽ ക്യാപ്റ്റൻ എബി ഡി വില്ലേഴ്സിന്റെ തകർപ്പൻ സെഞ്ചുറിയുടെ ബലത്തിൽ പാകിസ്താനെ പരാജയപ്പെടുത്തി ദക്ഷിണാഫ്രിക്കയ്ക്ക് കിരീടം. ഫൈനലിൽ 9 വിക്കറ്റിനാണ് ദക്ഷിണാഫ്രിക്ക മിന്നും വിജയം സ്വന്തമാക്കിയത്.
ആദ്യം ബാറ്റ് ചെയ്ത പാകിസതാൻ നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 195 റൺസ് നേടി. 16.5 ഓവറിൽ ഒരു വിക്കറ്റ് മാത്രം നഷ്ടത്തിൽ ദക്ഷിണാഫ്രിക്ക ലക്ഷ്യം മറികടക്കുകയായിരുന്നു. ടോസ് നേടി ബാറ്റിങ് തിരഞ്ഞെടുത്ത പാകിസ്താൻ ഓപ്പണർ ഷർജീൽ ഖാന്റെ അർധസെഞ്ചുറിയുടെ (44 പന്തിൽ 76) ബലത്തിലാണ് മികച്ച സ്കോർ നേടിയത്. ഉമർ അമീൻ(36), ഷുഹൈബ് മാലിക്(20), ആസിഫ് അലി(28), ക്യാപ്റ്റൻ മുഹമ്മദ് ഹഫീസ്(17) എന്നിവരും രണ്ടക്കം കടന്നു. ദക്ഷിണാഫ്രിക്കയ്ക്കു വേണ്ടി വിൽ ജോയനും പാർനലും 2 വിക്കറ്റ് വീതം നേടി.
മറുപടി ബാറ്റിങ്ങിൽ 60 പന്തിൽ 120 റൺസ് നേടിയ ഡിവില്ലേഴ്സിന്റെ പ്രകടനമാണ് ദക്ഷിണാഫ്രക്കയ്ക്കു വിജയം സമ്മാനിച്ചത്. ഓപ്പണറായി കളത്തിലിറങ്ങിയ ഡിവില്ലേഴ്സ് വിജയം നേടുന്നതുവരെ ക്രിസീൽ തുടർന്നു. 6 സിക്സുകളും 12 ഫോറുകളും താരം നേടി. 28 പന്തിൽ 50 നേടിയ ജെപി ഡുമിനി മികച്ച പിന്തുണ നൽകി. നിറം മങ്ങിയ പാക് ബോളിങ് നിരയിൽ സഈദ് അജ്മലിനു മാത്രമാണ് വിക്കറ്റ് ലഭിച്ചത്.
ടൂർണമെന്റിലെയും ഫൈനലിലെയും താരമായി ഡിവില്ലേഴ്സിനെ തിരഞ്ഞെടുത്തു. ടൂർണമെന്റിൽ 3 സെഞ്ചുറികളാണ് ഡിവില്ലേഴ്സ് നേടിയത്. നേരത്തേ ഇന്ത്യ ചാംപ്യൻസ് സെമി ഫൈനലിൽ പിന്മാറിയതോടെയാണ് പാകിസ്താൻ ഫൈനലിലെത്തിയത്.
SUMMARY: AB de Villiers’ masterclass helps South Africa Champions lift WCL 2025 title.
