മദ്യപിച്ച് വാഹനമോടിച്ചു; സ്കൂൾ ബസ് ഡ്രൈവർമാർക്കെതിരെ കേസ്

ബെംഗളൂരു: മദ്യപിച്ച് വാഹനമോടിച്ചതിന് സ്കൂൾ ബസ് ഡ്രൈവർമാർക്കെതിരെ കേസെടുത്തു. ബെംഗളൂരുവിലെ 23 സ്കൂൾ ബസ് ഡ്രൈവർമാർക്കെതിരെയാണ് കേസെടുത്തതെന്ന് ട്രാഫിക് പോലീസ് അറിയിച്ചു.

ചൊവ്വാഴ്ച രാവിലെ 7 മുതൽ 9 മണി വരെ നടത്തിയ സ്‌പെഷ്യൽ ഡ്രൈവിലാണ് കേസുകൾ രജിസ്റ്റർ ചെയ്തത്. 3016 സ്‌കൂൾ വാഹനങ്ങൾ പരിശോധിച്ചതിൽ 23 ഡ്രൈവർമാർ മദ്യപിച്ചതായി കണ്ടെത്തി. മോട്ടോർ വെഹിക്കിൾ ആക്‌ട് പ്രകാരമാണ് ഇവർക്കെതിരെ കേസെടുത്തതെന്ന് ജോയിൻ്റ് പോലീസ് കമ്മീഷണർ (ട്രാഫിക്) എം.എൻ. അനുചേത് പറഞ്ഞു.

തുടർ നടപടികൾക്കായി ഇവരുടെ ഡ്രൈവിംഗ് ലൈസൻസുകൾ റദ്ദാക്കാൻ ബന്ധപ്പെട്ട റീജിയണൽ ട്രാൻസ്‌പോർട്ട് ഓഫീസുകളിലേക്ക് അയച്ചിട്ടുണ്ടെന്നും അദ്ദേഹം പറഞ്ഞു. സ്‌പെഷ്യൽ ഡ്രൈവിൽ ഫിറ്റ്‌നസ് സർട്ടിഫിക്കറ്റ് ഇല്ലാത്ത 11 വാഹനങ്ങൾ കണ്ടെത്തി. ഇവ തുടർനടപടികൾക്കായി ബന്ധപ്പെട്ട ആർടിഒമാർക്ക് കൈമാറും. വിദ്യാർഥികളുടെയും മറ്റ് റോഡ് ഉപയോക്താക്കളുടെയും സുരക്ഷ ഉറപ്പാക്കാൻ ഇത്തരം സ്‌പെഷ്യൽ ഡ്രൈവുകൾ പതിവായി തുടരുമെന്ന് അനുചേത് കൂട്ടിച്ചേർത്തു.

TAGS: BENGALURU UPDATES | TRAFFIC POLICE
SUMMARY: Bengaluru police crackdowns on school bus drivers