കരമനയാറ്റില്‍ മൂന്ന് ദിവസത്തോളം പഴക്കം ചെന്ന അജ്ഞാത മൃതദേഹം കണ്ടെത്തി

തിരുവനന്തപുരം: കരമനയാറ്റില്‍ അജ്ഞാത മൃതദേഹം കണ്ടെത്തി. ഉടൻതന്നെ സമീപവാസികള്‍ വിവരം പോലീസില്‍ അറിയിക്കുകയായിരുന്നു. കരമന- ആഴങ്കല്‍ ഭാഗത്തായി അക്ഷയ ഗാർഡൻസിന് സമീപമാണ് മൃതദേഹം കാണപ്പെട്ടത്. മരക്കമ്പുകള്‍ക്കിടയില്‍ കമഴ്ന്നു കിടക്കുന്ന നിലയിലായിരുന്നു മൃതദേഹം കണ്ടെത്തിയത്.

തുടർന്ന് പോലീസ് തിരുവനന്തപുരം ഫയർഫോഴ്സ് യൂണിറ്റില്‍ വിവരം അറിയിച്ചു. തുടർന്ന് തിരുവനന്തപുരം നിലയത്തില്‍ നിന്നും സീനിയർ ഫയർ ആൻഡ് റെസ്ക്യൂ ഓഫീസർ ഷാഫിയുടെ നേതൃത്വത്തില്‍ സേനാംഗങ്ങളെത്തി ഡിങ്കി ബോട്ടില്‍ ചെന്ന് മരക്കൊമ്പുകള്‍ക്കിടയില്‍ കുടുങ്ങിക്കിടന്ന മൃതദേഹം കരയ്ക്ക് എത്തിച്ചു. മൃതദേഹത്തിന് മൂന്ന് ദിവസത്തോളം പഴക്കമുണ്ടാകുമെന്ന് ഫയർഫോഴ്സ് ഉദ്യോഗസ്ഥർ അറിയിച്ചു.

പാൻ്റും ഷർട്ടുമാണ് ധരിച്ച നിലയിലാണ് മൃതദേഹം കണ്ടെത്തിയത്. സേനാംഗങ്ങളായ വിജിൻ, ശ്രീരാഗ്, ജീവൻ, വിമല്‍ എന്നിവർ ചേർന്നാണ് മൃതദേഹം കരയിലെത്തിച്ചത്. കരമന പോലീസ് അന്വേഷണം തുടങ്ങിയിട്ടുണ്ട്. ആളെ തിരിച്ചറിയാനായിട്ടില്ല.

SUMMARY: An unidentified body, about three days old, was found in Karamana Yatra