ബെംഗളൂരു: ബി.കെ. ഹരിപ്രസാദിനെ കർണാടക പ്രദേശ് കോൺഗ്രസ് കമ്മിറ്റിയുടെ പ്രസിഡന്റായി പാർട്ടി അധ്യക്ഷൻ മല്ലികാർജുൻ ഖാർഗെ നിയമിച്ചു.നിലവിലെ പ്രസിഡന്റ് ഡി.കെ. ശിവകുമാർ മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റതിന് പിന്നാലെയാണ് സംഘടനയെ നയിക്കാൻ ഹരിപ്രസാദിനെ നിയോഗിച്ചുകൊണ്ടുള്ള ഔദ്യോഗിക പ്രഖ്യാപനം ബുധനാഴ്ച ഉണ്ടായത്. പിന്നാക്കവിഭാഗത്തിൽനിന്നുള്ള പ്രമുഖ നേതാവാണ് ബി.കെ. ഹരിപ്രസാദ്. സിദ്ധരാമയ്യ പക്ഷക്കാരനായി അറിയപ്പെടുന്ന നേതാവാണ്.
എ.ഐ.സി.സി ജനറൽ സെക്രട്ടറി കെ.സി. വേണുഗോപാലാണ് ഹരിപ്രസാദിന്റെ നിയമനം സംബന്ധിച്ച ഔദ്യോഗിക പ്രസ്താവന പുറത്തിറക്കിയത്. കോൺഗ്രസിന്റെ സംഘടനാ രംഗത്ത് വളരെ വലിയ പരിചയസമ്പത്തുള്ള നേതാവാണ് ബി.കെ. ഹരിപ്രസാദ്. നിലവിൽ ഹരിയാന കോൺഗ്രസിന്റെ ചുമതലയുള്ള അദ്ദേഹം പുതിയ ഉത്തരവാദിത്തം ഏറ്റെടുക്കുന്നതോടെ ആ സ്ഥാനം ഒഴിയുമെന്നാണ് കരുതപ്പെടുന്നത്.
SUMMARY: B.K. Hariprasad Karnataka PCC President
