കൊച്ചി: ലൈംഗികാധിക്ഷേപം നടത്തിയെന്ന നടി ഹണി റോസിന്റെ പരാതിയില് റിമാൻഡില് കഴിയുന്ന ബോബി ചെമ്മണൂരിന്റെ ജാമ്യാപേക്ഷ ഹൈക്കോടതി ഇന്ന് വീണ്ടും പരിഗണിക്കും. പോലീസ് റിപ്പോർട്ട് കൂടി പരിഗണിച്ചായിരിക്കും ജസ്റ്റിസ് പി.വി.കുഞ്ഞികൃഷ്ണൻ ജാമ്യാപേക്ഷയില് വിധി പറയുക.
എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി ജാമ്യം നിഷേധിച്ചതോടെയാണ് ഹൈക്കോടതിയില് ബോബി ചെമ്മണ്ണൂര് ജാമ്യാപേക്ഷ നല്കിയത്. ബോബിക്ക് ജാമ്യം നല്കരുതെന്ന് സര്ക്കാര് ആവശ്യപ്പെടും. പരാതിക്കാരിയെ പിന്നാലെ നടന്ന് അപമാനിക്കുക ആയിരുന്നെന്നും പൊതു പരിപാടിയ്ക്കിടെ അനുവാദമില്ലാതെ ശരീരത്തില് കടന്നു പിടിച്ചെന്നും പ്രോസിക്യൂഷന് അറിയിക്കും.
എന്നാല് അത്ര ഗുരുതരമായ ആരോപണങ്ങളല്ല തനിക്കെതിരെ ഉളളതെന്നും പോലീസ് ചോദ്യം ചെയ്യല് അവസാനിച്ചതിനാല് ജാമ്യം നല്കണമെന്നുമാകും ബോബി ചെമ്മണ്ണൂരിന്റെ ആവശ്യം. നടിയോട് മോശമായി പെരുമാറിയിട്ടില്ല. തനിക്കെതിരെ ആരോപിച്ചിരിക്കുന്ന കുറ്റങ്ങള് നിലനില്ക്കുന്നതല്ലെന്നും മജിസ്ട്രേറ്റ് കോടതി താന് ഹാജരാക്കിയ രേഖകള് കൃത്യമായി പരിശോധിച്ചില്ലെന്നുമുള്ള വാദങ്ങളാണ് വെള്ളിയാഴ്ച ബോബി ചെമ്മണ്ണൂര് ഹൈക്കോടതിയില് ഉന്നയിച്ചത്.
എന്നാല് അടിയന്തരമായി ഹര്ജി പരിഗണിക്കേണ്ട എന്ത് സാഹചര്യം ആണുള്ളതെന്ന് ചോദിച്ച ശേഷമാണ് ഹൈക്കോടതി ഹര്ജി പരിഗണിക്കുന്നത് ഇന്നത്തേക്ക് മാറ്റിയത്.
TAGS : BOBBY CHEMMANNUR
SUMMARY : Bail application of Bobby Chemmannur in High Court today
