കൊച്ചി: വയനാട് മുണ്ടക്കൈ – ചൂരല്മല ദുരന്ത ബാധിതരുടെ ബാങ്ക് വായ്പ കേന്ദ്ര സർക്കാർ എഴുതിത്തള്ളില്ല. ബാങ്ക് വായ്പ എഴുതിത്തള്ളാൻ നിയമത്തില് വ്യവസ്ഥയില്ലെന്ന് കേന്ദ്ര സർക്കാർ ഹൈക്കോടതിയില് അറിയിച്ചു. വായ്പ എഴുതിത്തള്ളല് കേന്ദ്രത്തിന്റെ അധികാര പരിധിക്ക് പുറത്തുള്ള കാര്യമാണെന്നാണ് കന്ദ്ര ആഭ്യന്തര മന്ത്രാലയം ഹൈക്കോടതിയില് സമർപ്പിച്ച സത്യവാങ്മൂലത്തില് പറയുന്നത്.
കേസ് ഹൈക്കോടതി ഇന്ന് പരിഗണിക്കാനിരിക്കെയാണ് കേന്ദ്ര സർക്കാർ സത്യവാങ്മൂലം സമർപ്പിച്ചത്. റിസർവ് ബാങ്കിന്റെ നയപ്രകാരം ദുരന്തബാധിത പ്രദേശങ്ങളില് ബാങ്കു വായ്പകള് പൂർണ്ണമായി എഴുതിതള്ളാൻ വ്യവസ്ഥയില്ല, 2015 ലെ ബാങ്കേഴ്സ് കോണ്ഫറൻസില് ഉണ്ടാക്കിയ ധാരണപ്രകാരം ബാങ്കിന്റെ ദൈനംദിന പ്രവർത്തനങ്ങളില് ഇടപെടാൻ കേന്ദ്ര സർക്കാറിന് അധികാരമില്ലെന്നും കേന്ദ്ര സർക്കാർ ഹൈക്കോടതിയില് സമർപ്പിച്ച സത്യവാങ്മൂലത്തില് പറയുന്നു.
മൊറട്ടോറിയം അനുവദിക്കാനുള്ള അധികാരം മാത്രമാണ് റിസർവ് ബാങ്ക് നല്കുന്നതെന്നും സത്യവാങ്മൂലത്തിലുണ്ട്. കേസ് പരിഗണിച്ച ഘട്ടങ്ങളിലെല്ലാം വായപ എഴുതിതള്ളുന്നത് സംബന്ധിച്ച് കേന്ദ്ര സർക്കാറിന്റെ ഭാഗത്ത് നിന്ന് കൃത്യമായമറുപടി ഉണ്ടായിരുന്നില്ല. നിലപാട് വ്യക്തമാക്കാത്തതില് പലതവണ കേന്ദ്ര സർക്കാറിനെ കോടതി വിമർശിക്കുകയും ചെയ്തിരുന്നു.
ഇന്ന് കേസ് പരിഗണിക്കുന്നതിന് മുമ്ബാണ് നിലപാട് അറിയിക്കാൻ കോടതി നിർദേശിച്ചിരുന്നത്. അതിന്റെ അടിസ്ഥാനത്തിലാണ് കേന്ദ്രസർക്കാർ സത്യവാങ്മൂലം സമർപ്പിച്ചത്. കേരള ബാങ്ക് ഉള്പ്പടെ വായ്പകള് എഴുതി തള്ളിയപ്പോഴും ദേശസാല്കൃത ബാങ്കുകള് വായ്പകള് എഴുതി തള്ളാൻ തയ്യാറായിരുന്നില്ല. പല ബാങ്കുകളും ദുരന്തബാധിതരുടെ അക്കൗണ്ടുകളില് നിന്ന് വായ്പകളുടെ മാസ അടവ് തിരിച്ചുപിടിക്കുകയും ചെയ്തിരുന്നു.
SUMMARY: Bank loans of Mundakai-Churalmala disaster victims will not be waived: Central government
