ബെംഗളൂരുവിൽ ഓട്ടോ നിരക്ക് ഓഗസ്റ്റ് 1 മുതൽ കൂടും

ബെംഗളൂരു: നഗരത്തിലെ ഓട്ടോ നിരക്ക് ഓഗസ്റ്റ് 1 മുതൽ വർധിക്കും. അടിസ്ഥാന നിരക്ക് 2 കിലോമീറ്ററിനു 30 രൂപയിൽ നിന്നു 36 രൂപയായി ഉയരും. തുടർന്നുള്ള ഓരോ കിലോമീറ്ററിനും 15 രൂപയെന്നത് 18 രൂപയാകും. ഇതുസംബന്ധിച്ച് ജില്ലാ ഗതാഗത അതോറിറ്റി ഉത്തരവിറക്കി.

രാത്രി 10 മുതൽ പുലർച്ചെ 5 വരെ ഒന്നര മടങ്ങ് തുക ഈടാക്കാം. ഒക്ടോബർ 31നു മുന്നോടിയായി ഡ്രൈവർമാർ പുതിയ നിരക്കിനനുസരിച്ച് മീറ്ററുകൾ പരിഷ്കരിക്കണമെന്ന് അധികൃതർ നിർദേശം നൽകി.

ജീവിത ചെലവുകൾ വർധിക്കുന്നതിനാൽ നിരക്ക് വർധിപ്പിക്കണമെന്ന ആവശ്യവുമായി ഓട്ടോ ഡ്രൈവർമാരുടെ സംഘടന രംഗത്തെത്തുകയായിരുന്നു. തുടർന്ന് ഇക്കാര്യം പരിശോധിച്ച ഡപ്യൂട്ടി കമ്മിഷണറുടെ നേതൃത്വത്തിലുള്ള സമിതിയാണ് നിരക്ക് വർധിപ്പിക്കാൻ ശുപാർശ ചെയ്തത്.

2021 നവംബറിലാണ് ഓട്ടോ നിരക്ക് അവസാനമായി വർധിപ്പിച്ചത്. നേരത്തേ നഗരത്തിൽ മെട്രോ, ബസ് നിരക്കുകളും വർധിപ്പിച്ചിരുന്നു.

SUMMARY: Bengaluru auto fares to increase from August 1