ബെംഗളൂരു: ബെംഗളൂരുവിലെ വിവിധ ഇടങ്ങളില്‍ സിറ്റി ക്രൈം ബ്രാഞ്ച് നർക്കോട്ടിക് വിഭാഗം നടത്തിയ പരിശോധനയിൽ 5.24 കോടി രൂപയുടെ മയക്കുമരുന്ന് പിടിച്ചെടുത്തതായി സിറ്റി കമ്മീഷണർ സീമന്ത് കുമാർ സിങ് അറിയിച്ചു. 9 വിദേശികളടക്കം 16 പേർ അറസ്റ്റിലായി. ബെംഗളൂരുവിൽനിന്നുള്ള രണ്ടുസ്ത്രീകളും ഇവരില്‍ ഉള്‍പ്പെടും. വെള്ളിയാഴ്ച പുലർച്ചെ മുതലാണ് പരിശോധന ആരംഭിച്ചത്. എം.ഡി.എം.എ., കഞ്ചാവ്, ഹൈഡ്രോ കഞ്ചാവ് എന്നിവ അടക്കമുള്ള മയക്കുമരുന്നാണ് പിടിച്ചെടുത്തത്.
മാർത്തഹള്ളി, വിദ്യാരണ്യപുര, മഹാദേവപുര, ഗോവിന്ദപുര, ചാമരാജ്പേട്ട്, എസ്. ആർ. നഗർ, നന്ദിനി ലേഔട്ട്, ബാനസവാടി, വൈറ്റ്ഫീൽഡ്, പരപ്പന അഗ്രഹാര, മാദനായകനഹള്ളി എന്നിവിടങ്ങളിലാണ് പരിശോധന നടത്തിയത്.
നഗരത്തിലെ ഐടി.-ബി.ടി. ജീവനക്കാർ, തൊഴിലാളികൾ എന്നിവർക്ക് വിൽപ്പന നടത്തി വരുന്ന സംഘമാണ് പിടിയിലായത്. പ്രതികളെ ചോദ്യം ചെയ്തുവരുകയാണന്നും ഇവര്‍ക്ക് മയക്കുമരുന്നുകള്‍ എത്തിച്ചുനല്‍കുന്ന കണ്ണികളെകുറിച്ച് അന്വേഷണം നടത്തുമെന്നും കമ്മിഷണർ പറഞ്ഞു.
SUMMARY: Big drug bust in Bengaluru; Drugs worth 5.24 crores seized, 16 people including 9 foreigners arrested
