ഡൽഹി: രണ്‍വീർ സിംഗിനെ നായകനാക്കി ആദിത്യ ധർ സംവിധാനം ചെയ്ത സ്പൈ ത്രില്ലർ ചിത്രം ‘ധുരന്ധർ 2’ ആഗോള ബോക്സ് ഓഫീസില്‍ ചരിത്രം കുറിച്ചുകൊണ്ട് കുതിപ്പു തുടരുന്നു. റിലീസ് ചെയ്ത് വെറും ഏഴു ദിവസങ്ങള്‍ക്കുള്ളില്‍ ചിത്രം 1000 കോടി രൂപയിലേറെ കളക്ഷൻ നേടിയിരിക്കുകയാണ്.
ഇന്ത്യൻ സിനിമാചരിത്രത്തില്‍ ഏറ്റവും വേഗത്തില്‍ 1000 കോടി ക്ലബ്ബില്‍ എത്തുന്ന രണ്ടാമത്തെ ചിത്രമായി ‘ധുരന്ധർ 2’ മാറി. ആറുദിവസംകൊണ്ട് ഈ നേട്ടം കൈവരിച്ച അല്ലു അർജുന്റെ ‘പുഷ്പ 2’ മാത്രമാണ് മുന്നിലുള്ളത്. എസ്.എസ്. രാജമൗലിയുടെ ‘ബാഹുബലി 2’ (ഒമ്പതു ദിവസംകൊണ്ട് 1000 കോടി), ‘ആർ.ആർ.ആർ.’ (RRR), ‘കെ.ജി.എഫ്. 2’, ‘കല്‍ക്കി 2898 എ.ഡി.’ എന്നീ പാൻ-ഇന്ത്യൻ ഹിറ്റുകളെയും ബോളിവുഡ് ചിത്രങ്ങളായ ‘പത്താൻ’, ‘ജവാൻ’ എന്നിവയെയും ഈ ചിത്രം പിന്നിലാക്കി.
കൂടാതെ, ആഗോളതലത്തില്‍ 100 ദശലക്ഷം (100 മില്യണ്‍) ഡോളർ മാർക്ക് മറികടക്കുന്ന എട്ടാമത്തെ ബോളിവുഡ് ചിത്രമെന്ന നേട്ടവും ‘ധുരന്ധർ 2’ സ്വന്തമാക്കി. മാർച്ച്‌ 19നാണ് ധുരന്ധർ 2 തീയറ്ററുകളിലെത്തിയത്. രണ്‍വീർ സിംഗിനൊപ്പം ആർ മാധവൻ, അർജുൻ രാംപാല്‍, സഞ്ജയ് ദത്ത്, സാറ അർജുൻ എന്നിവരാണ് പ്രധാന വേഷങ്ങളിലെത്തുന്നത്. ചിത്രത്തിന്റെ ഒന്നാം ഭാഗം 1300 കോടിയാണ് നേടിയത്.
SUMMARY: ‘Dhurandhar 2’ surges in collections; second fastest Indian film to cross Rs 1000 crore
