മദ്യലഹരിയില്‍ മകൻ അച്ഛനെ അടിച്ചു കൊന്നു; അമ്മാവനും കുത്തേറ്റു

തിരുവനന്തപുരം: തിരുവനന്തപുരം അമ്പൂരിയില്‍ കുടുംബ വഴക്കിനിടെ മകൻ അച്ഛനെ അടിച്ചു കൊന്നു. അമ്പൂരി കുരുവിക്കോണം സ്വദേശി തോമസ് എബ്രഹാം (62) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് മകൻ ഷൈനുവിനെ വെള്ളറട പോലീസ് കസ്റ്റഡിയിലെടുത്തു. ഇന്നലെ രാത്രി 11 മണിയോടെയാണ് നടുക്കിയ സംഭവം നടന്നത്.

ഷൈനുവിന്റെ വിവാഹവാർഷികാഘോഷങ്ങള്‍ക്ക് പിന്നാലെയുണ്ടായ തർക്കമാണ് കൊലപാതകത്തില്‍ കലാശിച്ചത്. ആഘോഷങ്ങള്‍ക്ക് ശേഷം ഷൈനുവും ഭാര്യയും തമ്മില്‍ വാക്കേറ്റമുണ്ടാവുകയും ഇത് തടയാൻ ശ്രമിച്ച അമ്മാവൻ വർഗീസിനെ ഷൈനു കത്തികൊണ്ട് കുത്തുകയുമായിരുന്നു. ആക്രമണം തടയാൻ എത്തിയ പിതാവ് തോമസ് എബ്രഹാമിനെ ഷൈനു കസേര കൊണ്ട് തലയ്‌ക്കടിച്ചു വീഴ്‌ത്തുകയായിരുന്നു. ഉടൻ തന്നെ സ്വകാര്യ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല.

സംഘർഷത്തില്‍ പരുക്കേറ്റ അമ്മാവൻ വർഗീസ് നിലവില്‍ ചികിത്സയിലാണ്. തോമസ് എബ്രഹാമിന്റെ മൃതദേഹം പോസ്റ്റ്മോർട്ടം നടപടികള്‍ക്കായി കാരക്കോണം മെഡിക്കല്‍ കോളേജ് ആശുപത്രിയിലേക്ക് മാറ്റി. പ്രതി ഷൈനുവിനെ പോലീസ് ചോദ്യം ചെയ്തു വരികയാണ്.

SUMMARY: Drunk son beats father to death; uncle also stabbed