കുറഞ്ഞ ചെലവിൽ ഗോവ ട്രിപ്പ്; 3 രാത്രിയും 2 പകലും നീളുന്ന യാത്രയുമായി കെ.എസ്.ആർ.ടി.സിയുടെ സ്‌കാനിയ, സൂപ്പർ ഡീലക്‌സ് ബസുകൾ

തിരുവനന്തപുരം: കെ.എസ്.ആർ.ടി.സി. ബജറ്റ് ടൂറിസം സെൽ പുതുതായി അവതരിപ്പിച്ച ഗോവ യാത്രയുടെ ബുക്കിങ് ആരംഭിച്ചു. ഏപ്രിൽ ആദ്യവാരം മുതൽ ആരംഭിക്കുന്ന ഈ പാക്കേജിൽ മൂന്ന് രാത്രിയും രണ്ട് പകലും നീളുന്ന ആവേശകരമായ യാത്രയാണ് ഒരുക്കിയിരിക്കുന്നത്. സുരക്ഷയ്ക്ക് മുൻഗണന നൽകിക്കൊണ്ട് 1 മുതൽ 80 വയസ്സുവരെയുള്ള യാത്രക്കാർക്ക് 10 ലക്ഷം രൂപയുടെ ട്രാവൽ ഇൻഷുറൻസ് കവറേജും കെഎസ്ആർടിസി വാഗ്ദാനം ചെയ്യുന്നുണ്ട്. കേരളത്തിലെ വിവിധ ഡിപ്പോകളിൽ നിന്ന് കാസറഗോഡ് വരെ സാധാരണ ബസിലും, അവിടെ നിന്ന് ഗോവയിലേക്ക് അത്യാധുനിക ആഡംബര എസി ബസിലുമായിരിക്കും യാത്ര.

കാസറഗോഡ് മുതൽ ഗോവ വരെയും തിരികെയും ഉള്ള ഭക്ഷണച്ചിലവ് പാക്കേജിൽ ഉൾപ്പെടുത്തിയിട്ടുണ്ട് എന്നത് സഞ്ചാരികൾക്ക് വലിയ ആശ്വാസമാണ്. ഗോവയിലെ മനോഹരമായ ബീച്ചുകൾ, നൈറ്റ് ലൈഫ് എന്നിവ ആസ്വദിക്കുന്നതിനൊപ്പം മികച്ച ഹോട്ടലുകളിലെ താമസസൗകര്യവും ഈ പാക്കേജിന്റെ ഭാഗമാണ്. ഗോവയ്ക്ക് പുറമെ ഊട്ടി, കൊടൈക്കനാൽ, രാമേശ്വരം തുടങ്ങിയ ടൂറിസ്റ്റ് കേന്ദ്രങ്ങളിലേക്കും പുതിയ എസി ബസുകൾ ഉപയോഗിച്ച് ഉടൻ സർവീസുകൾ ആരംഭിക്കും.