ഡൽഹി: ഇന്റർനെറ്റ് ലഭ്യതയും അത് ഉപയോഗിക്കാനുള്ള അവകാശവും ഭരണഘടന ഉറപ്പുനല്‍കുന്ന മൗലികാവകാശമാണെന്ന് സുപ്രീം കോടതി. കുട്ടികള്‍ ഉള്‍പ്പെടെ രാജ്യത്തെ ഓരോ വ്യക്തിക്കും ഈ അവകാശത്തിന് അർഹതയുണ്ടെന്ന് ജസ്റ്റിസ് ജെ. ബി. പർദിവാല, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ച് വ്യക്തത വരുത്തി. ഭരണഘടനയുടെ 19(1)(എ), 21 എന്നീ വകുപ്പുകള്‍ ചൂണ്ടിക്കാട്ടിയായിരുന്നു കോടതിയുടെ ചരിത്രപരമായ നിരീക്ഷണം.
സോഷ്യല്‍ മീഡിയ പ്ലാറ്റ്‌ഫോമുകളില്‍ കുട്ടികളുടെ ലൈംഗിക ചൂഷണവും ദുരുപയോഗവുമായി ബന്ധപ്പെട്ട ഉള്ളടക്കങ്ങള്‍ കണ്ടെത്തുന്നതിനും നീക്കം ചെയ്യുന്നതിനുമുള്ള സംവിധാനങ്ങള്‍ ശക്തമാക്കാൻ ഉത്തരവിട്ടുകൊണ്ടാണ് കോടതി ഈ പ്രഖ്യാപനം നടത്തിയത്. ഭരണഘടനയുടെ 19(1)(എ) പ്രകാരമുള്ള അഭിപ്രായ സ്വാതന്ത്ര്യത്തില്‍ വിവരങ്ങളും ആശയങ്ങളും അറിയാനും പങ്കുവെക്കാനുമുള്ള അവകാശവും ഉള്‍പ്പെടുന്നു.
പ്രത്യേക പ്രായപരിധിക്ക് പുറത്തുള്ള കുട്ടികള്‍ക്ക് അഭിപ്രായസ്വാതന്ത്ര്യത്തിന് അവകാശമില്ലെന്ന് പറയുന്നതുപോലെ അസംബന്ധമാണ് കുട്ടികള്‍ക്ക് ഇന്റർനെറ്റ് ലഭ്യത നിഷേധിക്കുന്നതെന്നും കോടതി നിരീക്ഷിച്ചു. കുട്ടികളുടെ സുരക്ഷയും അവകാശങ്ങളും പരസ്പരം ബന്ധപ്പെട്ടുകിടക്കുന്നതാണെന്നും രണ്ടിനും കുട്ടികള്‍ അർഹരാണെന്നും കോടതി വ്യക്തമാക്കി. അപകടകരമായ ഉള്ളടക്കങ്ങളില്‍നിന്ന് കുട്ടികളെ സംരക്ഷിക്കാനുള്ള മാർഗം ഇന്റർനെറ്റ് ലഭ്യത ഇല്ലാതാക്കുകയല്ലെന്നും സുപ്രീം കോടതി ചൂണ്ടിക്കാട്ടി.
ഇത്തരം ഉള്ളടക്കങ്ങള്‍ കണ്ടെത്തി നീക്കം ചെയ്യുന്നതില്‍ ഇന്റർനെറ്റ് പ്ലാറ്റ്‌ഫോമുകള്‍ കൂടുതല്‍ ഉത്തരവാദിത്തം കാണിക്കണം. ഉള്ളടക്കങ്ങള്‍ നീക്കം ചെയ്യുന്നതിനുപകരം രക്ഷിതാക്കളുടെ അനുമതി തേടാനുള്ള സംവിധാനങ്ങള്‍ ഒരുക്കുന്നതുകൊണ്ട് മാത്രം പ്രശ്നം പരിഹരിക്കാനാകില്ലെന്നും കോടതി നിരീക്ഷിച്ചു. കുട്ടികളുടെ സുരക്ഷ ഉറപ്പാക്കുന്നതിനൊപ്പം അവരുടെ അഭിപ്രായസ്വാതന്ത്ര്യവും ഇന്റർനെറ്റ് ലഭ്യതയുമായി ബന്ധപ്പെട്ട അവകാശങ്ങളും സംരക്ഷിക്കപ്പെടേണ്ടതുണ്ടെന്നാണ് കോടതിയുടെ നിലപാട്.
SUMMARY: Internet is a fundamental right for children too; Supreme Court delivers a landmark verdict
