ബെംഗളൂരു: ഇരുചക്ര വാഹനങ്ങൾ ഒഴികെയുള്ള ഇലക്ട്രിക് വാഹനങ്ങൾക്ക് നൽകിയിരുന്ന റോഡ് നികുതി ഇളവ് പിൻവലിക്കാനൊരുങ്ങി കർണാടക സർക്കാർ. ഇതിനുള്ള ഭേദഗതി ബിൽ നിയമസഭയിൽ പാസാക്കി. പരിസ്ഥിതി സൗഹൃദ ഗതാഗതം പ്രോത്സാഹിപ്പിക്കുന്നതിനായി ഇതുവരെ നൽകിയിരുന്ന ആനുകൂല്യങ്ങൾ വെട്ടിക്കുറച്ചകൊണ്ടുള്ള ‘2026-ലെ കർണാടക മോട്ടോർ വാഹന നികുതി ഭേദഗതി ബിൽ’ ആണ് നിയമസഭ പാസാക്കിയത്. ഗവർണറുടെ അംഗീകാരം കൂടി ലഭിക്കുന്നതോടെ സംസ്ഥാനത്ത് ഇലക്ട്രിക് കാറുകൾക്കും മറ്റ് വലിയ വാഹനങ്ങൾക്കും വൻതോതിൽ വില വർധിക്കും. നിലവിൽ പൂർണ്ണമായും നികുതി ഒഴിവാക്കിയിരുന്ന സ്ഥാനത്താണ് പുതിയ ഭേദഗതി വരുന്നത്. പ്രൈവറ്റ് കാറുകൾ, ജീപ്പുകൾ, ചെറിയ ബസുകൾ, ടാക്സികൾ എന്നിവയ്ക്ക് ലൈഫ് ടൈം ടാക്സ് സ്ലാബുകളും ഈ ബില്ലിൽ നിർദേശിച്ചിട്ടുണ്ട്. നിലവിൽ കാറുകൾക്ക് നൽകി വന്നിരുന്ന നികുതി ഇളവ് മാത്രമാണ് പിൻവലിച്ചിരിക്കുന്നത്.
ബിൽ പ്രാബല്യത്തിൽ വരുന്നതോടെ 10 ലക്ഷം രൂപ വരെ വിലയുള്ള ഇലക്ട്രിക് വാഹനങ്ങൾക്ക് പത്ത് ശതമാനം നികുതിയായിരിക്കും ചുമത്തുക. പത്ത് ലക്ഷം രൂപ മുതൽ 20 ലക്ഷം രൂപ വരെ വിലയുള്ള ഇലക്ട്രിക് കാറുകൾക്ക് 12 ശതമാനം നികുതിയും ഇതിന് മുകളിൽ വില വരുന്ന വാഹനങ്ങൾക്ക് 14 ശതമാനം നികുതിയും ചുമത്താനാണ് തീരുമാനിച്ചിരിക്കുന്നത്. മുമ്പ് പൂർണമായും നികുതി ഒഴിവാക്കിയാണ് ഈ വാഹനം എത്തിയിരുന്നത്.
അതേസമയം, സാധാരണക്കാർക്ക് ആശ്വാസമായി ഇലക്ട്രിക് ഇരുചക്ര വാഹനങ്ങൾക്കുള്ള നികുതി ഇളവുകൾ തുടരുമെന്ന് സർക്കാർ വ്യക്തമാക്കിയിട്ടുണ്ട്. ഇലക്ട്രിക് വാഹന വിപണിയിൽ വലിയ മുന്നേറ്റം ലക്ഷ്യമിട്ട് കേന്ദ്ര-സംസ്ഥാന സർക്കാരുകൾ നൽകിവന്ന സബ്സിഡികളും മറ്റ് ആനുകൂല്യങ്ങളും കുറയുന്നത് വാഹനപ്രേമികൾക്കിടയിൽ ആശങ്കയുണ്ടാക്കുന്നുണ്ട്. കർണാടകയുടെ ഈ നീക്കം വരും ദിവസങ്ങളിൽ ഇലക്ട്രിക് വാഹന വിൽപ്പനയെ എങ്ങനെ ബാധിക്കുമെന്ന് വാഹന വിപണി ഉറ്റുനോക്കുകയാണ്.
SUMMARY: Karnataka passes new bill to withdraw tax exemptions for electric cars
WhatsApp
Telegram
