ചെന്നൈ: നിയമസഭാ തിരഞ്ഞെടുപ്പിന് മുന്നോടിയായി തമിഴ്നാട് പോലീസ് മേധാവിയെ മാറ്റി ഇലക്ഷൻ കമ്മീഷൻ. ക്രമസമാധാന ചുമതലയുണ്ടായിരുന്ന ഡിജിപി ജി. വെങ്കിട്ടരാമനെ ആണ് മാറ്റിയത്. ഇതിനുപകരമായി സന്ദീപ് റായ് റാത്തോറിനെ ഡിജിപിയായി നിയമിച്ച് ഉത്തരവിട്ടു. തിരഞ്ഞെടുപ്പ് കമ്മിഷൻ സെക്രട്ടറി ലത ത്രിപാഠിയാണ് ഉത്തരവ് പുറപ്പെടുവിച്ചത്. തിരഞ്ഞെടുപ്പുമായി ബന്ധപ്പെട്ട പൊലീസ് നടപടികളുടെ മേൽനോട്ട ചുമതല സന്ദീപ് റായ് റാത്തോറിനായിരിക്കും.
ഇതിനു പുറമേ താംബരം സിറ്റി പോലീസ് കമ്മിഷണറായിരുന്ന എ. അമൽരാജിന് പകരം സഞ്ജയ് കുമാറിനെ നിയമിച്ചു. ആർ.വി. രമ്യ ഭാരതിയെ കോയമ്പത്തൂർ വെസ്റ്റ് സോൺ ഐ.ജിയായി നിയമിച്ചു. മധുര സിറ്റി പൊലീസ് കമ്മിഷണായി അഭിഷേക് ദീക്ഷിതിനെ നിയമിച്ചു, തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നത് വരെ ഈ ഉദ്യോഗസ്ഥർ തത്സ്ഥാനങ്ങളിൽ തുടരും.
പുതിയ ഉദ്യോഗസ്ഥർ വെള്ളിയാഴ്ച രാവിലെ 11ന് ചുമതലയേൽക്കാനും കമ്മിഷൻ നിർദ്ദേശിച്ചു. ഡി.എം.കെ സർക്കാർ നിയമിച്ച് പൊലീസ് ഉദ്യോഗസ്ഥർ ഉന്നത പദവികളിൽ തുടരുന്നതിന് എതിരെ ബി.ജെ.പി നേതാക്കളിൽ നിന്ന് വിമർശനം ഉയർന്നിരുന്നു. ഇതിന് പിന്നാലെയാണ് ഇലക്ഷൻ കമ്മിഷന്റെ നടപടി.
SUMMARY: Police reshuffle in Tamil Nadu ahead of assembly elections; Election Commission replaces DGP
