കൊച്ചി: കോറോ ഹെല്‍ത്ത് കമ്പനിയിലെ കൂട്ടപ്പിരിച്ചുവിടലുമായി ബന്ധപ്പെട്ട തർക്കങ്ങള്‍ക്ക് ഒടുവില്‍ ശാശ്വത പരിഹാരം. കമ്പനി അധികൃതരുമായി നടത്തിയ നിർണായക ചർച്ചയില്‍ ജീവനക്കാർക്ക് അനുകൂലമായ തീരുമാനമായതായി തൊഴില്‍ വകുപ്പ് മന്ത്രി ബിന്ദു കൃഷ്ണ അറിയിച്ചു. ചർച്ചയിലെ വ്യവസ്ഥകള്‍ പ്രകാരം പിരിച്ചുവിടപ്പെട്ട മുഴുവൻ ജീവനക്കാർക്കും അഞ്ച് മാസത്തെ ശമ്പളം കമ്പനി അധികൃതർ നല്‍കും.
നേരത്തെ നല്‍കിയ രണ്ട് മാസത്തെ ശമ്പളത്തിന് പുറമെയാണ് ഈ അഞ്ച് മാസത്തെ ശമ്പളം കൂടി അധികമായി നല്‍കുക. ഈ തുക ജൂലൈ 26-ാം തീയതിക്ക് മുമ്പായി ജീവനക്കാരുടെ അക്കൗണ്ടുകളില്‍ ലഭ്യമാക്കും. ഇതിന് പുറമെ, ജീവനക്കാർക്ക് മറ്റ് സ്ഥാപനങ്ങളില്‍ ജോലി കണ്ടെത്തുന്നതിന് ആവശ്യമായ എക്സ്പീരിയൻസ് സർട്ടിഫിക്കറ്റ്, ലീവിങ് സർട്ടിഫിക്കറ്റ് തുടങ്ങിയ എല്ലാ ഔദ്യോഗിക രേഖകളും കമ്പനി ഉടൻ കൈമാറുമെന്നും മന്ത്രി വ്യക്തമാക്കി.
ഐഎൻടിയുസി സംസ്ഥാന പ്രസിഡന്റും ഈ അനുരഞ്ജന ചർച്ചയില്‍ പങ്കെടുത്തു. കമ്പനി അധികൃതരുമായി ഉണ്ടാക്കിയ ഈ ഒത്തുതീർപ്പ് തീരുമാനത്തില്‍ തൃപ്തരാണെന്ന് കോറോ ഹെല്‍ത്തിലെ ജീവനക്കാർ പ്രതികരിച്ചു.
SUMMARY: Koro Health mass layoffs; agreement reached to provide seven months’ compensation to employees
