ബെംഗളൂരു: നഗര വികസനത്തിന് രാജ്യത്ത് വലിയ പ്രതീക്ഷയുണ്ടാക്കിയ ബെംഗളൂരു ബിസിനസ് കോറിഡോര് പദ്ധതിക്കായി വിവിധ ഭൂമി ഉടമകള് ബംഗളൂരു ഡെവലപ്പ്മെന്റ് അതോറിറ്റിക്ക് ഭൂപ്രതിഭാഗങ്ങള് കൈമാറിത്തുടങ്ങി. അടുത്തിടെ സർക്കാർ പുറത്തിറക്കിയ പുതിയ അഞ്ച് നഷ്ടപരിഹാര മോഡലുകളാണ് ദീർഘകാലമായി തർക്കങ്ങളിലായിരുന്ന പദ്ധതിക്ക് ജീവൻ നൽകിയത്.
ആവശ്യമായ നഷ്ടപരിഹാരം ലഭിച്ചതിന് പിന്നാലെ നിരവധി ഭൂമി ഉടമകൾ തങ്ങളുടെ ഭൂമി ഔദ്യോഗികമായി കൈമാറിത്തുടങ്ങി.പദ്ധതിയുടെ ആദ്യഘട്ടമായാണ് ഭൂമി കൈമാറ്റം ആരംഭിച്ചത്. നഷ്ടപരിഹാരമായി പണം, വികസിപ്പിച്ച പ്ലോട്ടുകൾ, ട്രാൻസ്ഫറബിൾ ഡെവലപ്മെന്റ് റൈറ്റ്സ് (ടിഡിആർ), അധിക ഫ്ലോർ ഏരിയ റേഷ്യോ തുടങ്ങിയ വിവിധ ഓപ്ഷനുകൾ ഭൂമി ഉടമകൾക്ക് ബെംഗളൂരു ഡെവലപ്പ്മെൻ്റ് അതോറിറ്റി വാഗ്ദാനം ചെയ്തിരുന്നു. ഇതിൽ സംതൃപ്തരായ ഭൂമി ഉടമകളാണ് ഇപ്പോൾ സ്വമേധയാ ഭൂമി കൈമാറുന്നതെന്ന് അധികൃതർ വ്യക്തമാക്കി.
നഗര ഗതാഗതക്കുരുക്ക് കുറയ്ക്കുന്നതിനും പുതിയ വാണിജ്യ മേഖലകൾ രൂപപ്പെടുത്തുന്നതിനും ലക്ഷ്യമിട്ടുള്ള പദ്ധതിയാണ് ബെംഗളൂരു ബിസിനസ് കോറിഡോർ. നഗരത്തെ ചുറ്റിപ്പറ്റി വലിയ റിങ് റോഡ്, ബിസിനസ് ഹബുകൾ, ലോജിസ്റ്റിക് സോണുകൾ എന്നിവ ഉൾപ്പെടുന്നതാണ് പദ്ധതി. മുമ്പ് പെരിഫറൽ റിങ് റോഡ് എന്ന പേരിൽ അറിയപ്പെട്ടിരുന്ന ഈ സംരംഭം, ഭൂമി ഏറ്റെടുക്കൽ സംബന്ധിച്ച തർക്കങ്ങൾ കാരണം വർഷങ്ങളോളം നീണ്ടുനിന്നിരുന്നു.
ഭൂമി കൈമാറ്റം വർധിച്ചതോടെ പദ്ധതി നടപ്പാക്കൽ വേഗത്തിലാകുമെന്ന പ്രതീക്ഷയിലാണ് സർക്കാർ.അതേസമയം, ചില പ്രദേശങ്ങളിലെ ഭൂമി ഉടമകളുമായി ഇപ്പോഴും നഷ്ടപരിഹാരം ബദ്ധപ്പെട്ട ആശങ്കകൾ തുടരുന്നതായും കൂടുതൽ ചർച്ചകൾ ആവശ്യമാണെന്നുമാണ് റിപ്പോർട്ടുകൾ.
SUMMARY: Landowners hand over property to BDA for Bengaluru Business Corridor after receiving compensation.
