ബെംഗളൂരു: ലുലു ഗ്രൂപ്പ് ഇന്ത്യയുടെ ഏറ്റവും പുതിയ ലുലു ഡെയ്‌ലി സ്റ്റോർ ബെംഗളൂരുവിലെ ജെ.പി. നഗർ മൂന്നാം ഫേസിൽ തുറന്നു. ഗ്രേറ്റർ ബെംഗളൂരു അതോറിറ്റി (ജി.ബി.എ) ചീഫ് കമ്മീഷണർ എം. മഹേശ്വർ റാവു ഐ.എ.എസ്., ലുലു ഗ്രൂപ്പ് ചെയർമാനും മാനേജിങ് ഡയറക്ടറുമായ എം.എ. യൂസഫലിയുടെ സാന്നിധ്യത്തിൽ ഉദ്ഘാടനം നിർവ്വഹിച്ചു. ലുലു ഗ്രൂപ്പ് ഇന്റർനാഷണൽ എക്സിക്യൂട്ടീവ് ഡയറക്ടർ എം.എ. അഷ്‌റഫ് അലി, ലുലു ഇന്റർനാഷണൽ ഹോൾഡിങ്സ് ലിമിറ്റഡ് ഡയറക്ടറും സി.ഒ.ഒ.യുമായ അനന്ത് റാം വിശ്വനാഥ്, ലുലു ഗ്രൂപ്പ് ഇന്റർനാഷണൽ ഡയറക്ടർ (മാർക്കറ്റിങ് ആൻഡ് കമ്യൂണിക്കേഷൻസ്) വി. നന്ദകുമാർ, ലുലു ഗ്രൂപ്പ് ഇന്ത്യ ഡയറക്ടറും സി.ഇ.ഒ.യുമായ എം.എ. നിഷാദ്, ലുലു ഗ്രൂപ്പ് ഇന്ത്യ ഡയറക്ടറും സി.ഒ.ഒ.യുമായ ഫഹാസ് അഷ്‌റഫ്, കർണാടക ഡയറക്ടർ നോമാൻ അസീസ് ഖാൻ, ലുലു കർണാടക റീജിയൻ റീജണൽ മാനേജർ കെ.പി. ജമാൽ, ലുലു റീട്ടെയിൽ കർണാടക ജനറൽ മാനേജർ കെ. നൗഷാദ് എന്നിവരും ചടങ്ങിൽ പങ്കെടുത്തു.
ബെംഗളൂരുവിലെ ലുലു ഗ്രൂപ്പിന്റെ ഏഴാമത്തെയും ഇന്ത്യയിലെ 22-ാമത്തെയും സ്റ്റോറാണിത്. 40,000 ചതുരശ്ര അടി വിസ്തീർണ്ണത്തിൽ വ്യാപിച്ചുകിടക്കുന്ന സ്റ്റോറിൽ വിശാലമായ പാർക്കിങ് സൗകര്യമുണ്ട്. സ്റ്റോർ ആരംഭിച്ചതോടെ 1,000-ത്തിലധികം ആൾക്കാർക്ക് നേരിട്ടും അല്ലാതെയുമായി തൊഴിലവസരങ്ങൾ ലഭിച്ചു.
കർഷകരിൽ നിന്ന് നേരിട്ട് ശേഖരിക്കുന്ന പഴങ്ങളും പച്ചക്കറികളും, ഉയർന്ന ഗുണനിലവാരമുള്ള മാംസം, കോഴിയിറച്ചി, കടൽ വിഭവങ്ങൾ, പാലുൽപ്പന്നങ്ങൾ, ബേക്കറി, വ്യക്തിഗത പരിചരണ ഉൽപ്പന്നങ്ങൾ, അടുക്കള ഉപകരണങ്ങൾ. ഡിജിറ്റൽ ഗാഡ്ജറ്റുകളും ഇലക്ട്രോണിക് ആക്സസറികളും ലഭിക്കുന്ന പ്രത്യേക വിഭാഗം എന്നിവ ഇവിടെ ലഭ്യമാണ്. ഒക്ടോബർ 31 വരെ വിവിധ ഉൽപ്പന്നങ്ങൾക്ക് പ്രത്യേക ഡിസ്കൗണ്ടുകളും പ്രൊമോഷണൽ ഓഫറുകളും ലഭ്യമാണ്.
