എം ആര്‍ അജിത് കുമാറിനെ ബെവ്കോ എംഡിയായി നിയമിച്ചു

തിരുവനന്തപുരം: എക്സൈസ് കമ്മീഷണർ സ്ഥാനത്തുനിന്നും ഇന്നലെ നീക്കം ചെയ്ത എഡിജിപി എം.ആർ. അജിത് കുമാറിനെ ബിവറേജസ് കോർപറേഷൻ സിഎംഡിയായി സർക്കാർ നിയമിച്ചു. നിലവില്‍ ബെവ്കോ സിഎംഡിയായിരുന്ന ഹർഷിത അട്ടല്ലൂരിയെ ട്രാഫിക് ഐജിയായി നിയമിച്ചതിനെത്തുടർന്നുള്ള ഒഴിവിലേക്കാണ് അജിത് കുമാറിന്റെ ഈ പുതിയ നിയമനം.

ഐഎഎസ് ഉദ്യോഗസ്ഥരെ മാത്രം നിയമിക്കേണ്ട കേഡർ തസ്തികകളില്‍ ഐപിഎസ് ഉദ്യോഗസ്ഥരെ നിയമിക്കാൻ പാടില്ലെന്ന കേന്ദ്ര അഡ്മിനിസ്‌ട്രേറ്റീവ് ട്രൈബ്യൂണലിന്റെ (സിഎടി) ഉത്തരവിനെത്തുടർന്നാണ് അജിത് കുമാറിനെ എക്സൈസ് കമ്മീഷണർ സ്ഥാനത്തുനിന്ന് മാറ്റേണ്ടി വന്നത്. ഐഎഎസ് ഓഫീസേഴ്സ് അസോസിയേഷൻ നല്‍കിയ ഹരജിയിലായിരുന്നു ട്രൈബ്യൂണലിന്റെ ഈ സുപ്രധാന വിധി.

ശബരിമലയിലെ ട്രാക്ടർ വിവാദത്തെത്തുടർന്ന് കഴിഞ്ഞ വർഷം ജൂലൈയിലാണ് അജിത് കുമാറിനെ പോലീസ് സേനയില്‍ നിന്നും എക്സൈസ് കമ്മീഷണറായി മാറ്റി നിയമിച്ചത്. എന്നാല്‍ ട്രൈബ്യൂണല്‍ ഉത്തരവ് വന്നതോടെ ഐപിഎസ് ഉദ്യോഗസ്ഥനായ അദ്ദേഹത്തിന് ആ സ്ഥാനത്ത് തുടരാനാകാത്ത സാഹചര്യം സംജാതമായി.

ഇതേത്തുടർന്നാണ് എക്സൈസ് കമ്മീഷണർ സ്ഥാനത്തുനിന്ന് അദ്ദേഹത്തെ ഒഴിവാക്കി ബെവ്‌കോയുടെ അമരത്തേക്ക് എത്തിച്ചിരിക്കുന്നത്. എജിപിയും സർക്കാർ അഭിഭാഷകരും തമ്മിലുള്ള നിയമപരമായ ചർച്ചകള്‍ക്ക് ശേഷമാണ് ഈ സ്ഥലംമാറ്റ നടപടികള്‍ പൂർത്തിയാക്കിയത്.

SUMMARY: MR Ajith Kumar appointed as Bevco MD