നീരജ് ചോപ്രയെ ലെഫ്റ്റനന്റ് കേണല്‍ പദവി നല്‍കി ആദരിച്ചു

ന്യൂഡൽഹി: ഒളിമ്പിക് മെഡല്‍ ജേതാവായ നീരജ് ചോപ്രയെ ടെറിട്ടോറിയല്‍ ആർമിയില്‍ ലെഫ്റ്റനന്റ് കേണല്‍ പദവി നല്‍കി ആദരിച്ചു. ഡല്‍ഹിയില്‍ വെച്ച്‌ നടന്ന ചടങ്ങില്‍ പ്രതിരോധ മന്ത്രി രാജ്‌നാഥ് സിങ്, കരസേനാ മേധാവി ജനറല്‍ ഉപേന്ദ്ര ദ്വിവേദി എന്നിവർ ചേർന്നാണ് അദ്ദേഹത്തിന് ബഹുമതി കൈമാറിയത്.

ഏപ്രില്‍ 16 മുതല്‍ ചോപ്രയുടെ നിയമനം പ്രാബല്യത്തില്‍ വന്നതായി പ്രതിരോധ മന്ത്രാലയം പ്രസ്താവനയില്‍ വ്യക്തമാക്കി. കായികമേഖലയില്‍ രാജ്യത്തിനു നല്‍കിയ സംഭാവനകള്‍ പരിഗണിച്ചാണ് ഈ ഓണററി പദവി നല്‍കിയത്. 2016 ഓഗസ്റ്റ് 26-ന് ഇന്ത്യൻ ആർമിയില്‍ നായിബ് സുബേദാർ റാങ്കില്‍ ജൂനിയർ കമ്മീഷൻഡ് ഓഫീസറായാണ് നീരജ് ചോപ്ര ചുമതലയേറ്റത്.

2024-ല്‍ അദ്ദേഹത്തിന് സുബേദാർ മേജറായി സ്ഥാനക്കയറ്റം ലഭിച്ചു. ടോക്കിയോ ഒളിമ്പിക്‌സില്‍ ജാവലിനില്‍ സ്വർണം നേടിയ താരത്തിന് 4 രജ്പുത്താന റൈഫിള്‍സ് പരം വിശിഷ്ട് സേവാ മെഡല്‍ നല്‍കി ആദരിച്ചിരുന്നു. 2020 ടോക്കിയോ ഒളിമ്പിക്സില്‍ സ്വർണവും 2024 പാരീസ് ഒളിമ്പിക്സില്‍ വെള്ളിയും നേടി.

ഒളിമ്പിക്സില്‍ ട്രാക്ക് ആൻഡ് ഫീല്‍ഡ് ഇനങ്ങളില്‍ മെഡലുകള്‍ നേടുന്ന ആദ്യ ഇന്ത്യൻ അത്‌ലറ്റാണ് നീരജ്. 2018-ല്‍ അർജുന അവാർഡ്, 2021-ല്‍ ഖേല്‍ രത്‌ന പുരസ്‌കാരം എന്നിവയും അദ്ദേഹം സ്വന്തമാക്കിയിട്ടുണ്ട്. അടുത്തിടെ നടന്ന ലോക അത്‌ലറ്റിക്സ് ചാമ്പ്യൻഷിപ്പില്‍ ലോക കിരീടം നിലനിർത്താൻ സാധിക്കാതിരുന്ന നീരജ് എട്ടാം സ്ഥാനത്താണ് ഫിനിഷ് ചെയ്തത്

SUMMARY: Neeraj Chopra honored with the rank of Lieutenant Colonel