ബെംഗളൂരു: ബെംഗളൂരു-മൈസൂരു ആക്സസ്-കൺട്രോൾഡ് ഹൈവേയിലെ ബിഡദി, രാമനഗര, ചന്നപട്ടണ എന്നിവിടങ്ങളിലെ താൽക്കാലിക പ്രവേശന, എക്സിറ്റ് പോയിന്റുകൾ അടച്ചുപൂട്ടിയ നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ) അധികൃതരുടെ നടപടിക്കെതിരെ ശക്തമായ പ്രതിഷേധവുമായി പ്രദേശവാസികള്. ടോൾ പ്ലാസകൾ മറികടക്കാൻ സർവീസ് റോഡുകൾ ഉപയോഗിക്കുന്നതു മൂലം വരുമാനനഷ്ടമുള്ളതായി ചൂണ്ടിക്കാട്ടിയാണ് എൻഎച്ച്എഐയുടെ നടപടി.
ബിഡദിയിലെ ദാസപ്പനദൊഡ്ഡിയിൽ എക്സ്പ്രസ്വേയിൽ പ്രവേശിക്കാനേ അനുമതിയുള്ളൂ. ഇവിടെ നിന്നു സർവീസ് റോഡിലേക്ക് പ്രവേശിക്കാനുള്ള എക്സിറ്റ് കവാടം അടച്ചു. രാമനഗരയിലെ സംഗബസവനദോഡിക്ക് സമീപം സമാനമായ നടപടി നടപ്പിലാക്കുന്നുണ്ട്, മൈസൂരുവിൽ നിന്ന് രാമനഗരയിലേക്ക് പോകുന്ന വാഹനമോടിക്കുന്നവർ ഉപയോഗിക്കുന്ന എക്സിറ്റ് പോയിന്റ് അടയ്ക്കുന്നതിനുള്ള ഒരുക്കങ്ങൾ പുരോഗമിക്കുകയാണ്.
മൂന്നു വര്ഷം മുമ്പ് എക്സ്പ്രസ്വേ ഗതാഗതത്തിന് തുറന്നപ്പോൾ പ്രദേശവാസികളുടെ ആവശ്യം മാനിച്ചാണ് സർവീസ് റോഡിലേക്ക് കടക്കാൻ താൽക്കാലികമായി എൻട്രി, എക്സിറ്റ് കവാടങ്ങൾ സ്ഥാപിച്ചത്. ബിഡദി, രാമനഗര, ചന്നപട്ടണ എന്നിവിടങ്ങളിലെ താമസക്കാർക്ക് ഇത് ഏറെ പ്രയോജനകരമായിരുന്നു. എന്നാൽ ഇവ ഓരോന്നായി അടച്ചു തുടങ്ങിയതോടെ ആയിരക്കണക്കിന് പ്രതിദിന യാത്രക്കാർ ബുദ്ധിമുട്ടിലായെന്നു പ്രദേശവാസികൾ ആരോപിക്കുന്നു.
SUMMARY: NHAI closes entry and exit gates of Bengaluru-Mysore Expressway; locals protest strongly
