ബെംഗളൂരുവിലെ റോഡുകളിലെ കുഴികൾ ഒരാഴ്ചക്കകം പൂർണമായും നികത്തണം; നിർദേശവുമായി മുഖ്യമന്ത്രി

ബെംഗളൂരു: ബെംഗളൂരുവിലെ റോഡുകളിലെ കുഴികൾ ഒരാഴ്ചക്കകം പൂർണമായും നികത്താൻ ഉദ്യോഗസ്ഥർക്ക് നിർദേശം നൽകി മുഖ്യമന്ത്രി സിദ്ധരാമയ്യ. ഗ്രേറ്റർ ബെംഗളൂരു അതോറിറ്റി ചീഫ് കമ്മിഷണർ മഹേശ്വർ റാവുവിനും നഗരവികസന വകുപ്പ് അഡിഷണൽ ചീഫ് സെക്രട്ടറി തുഷാർ ഗിരിനാഥിനുമാണ് നിർദേശം നൽകിയത്. ഗാന്ധിനഗർ നിയോജകമണ്ഡലത്തിലെ വിവിധ വികസനപ്രവൃത്തികളുടെ ഉദ്ഘാടനം നിർവഹിക്കവേയാണ് അദ്ദേഹം ഇക്കാര്യം വ്യക്തമാക്കിയത്.

മഴ തുടരുന്നതാണ് അറ്റകുറ്റ പ്രവൃത്തികൾ വൈകാൻ കാരണമാകുന്നതെന്നും മുഖ്യമന്ത്രി പറഞ്ഞു. നഗരത്തിലെ വിവിധ റോഡുകൾ കോൺക്രീറ്റ് ചെയ്യുന്ന പദ്ധതികൾ നടന്നുവരുന്നുണ്ട്. കൂടുതൽ റോഡുകൾ കോൺക്രീറ്റ് ചെയ്ത് ഉറപ്പുകൂട്ടുന്നതോടെ തകർച്ചയും കുഴികൾ രൂപപ്പെടുന്നതും കുറയുമെന്നും മുഖ്യമന്ത്രി പറഞ്ഞു.