ബെംഗളൂരു: നഗരത്തിലും സമീപ പ്രദേശങ്ങളിലും മഴ തുടരുന്ന സാഹചര്യത്തിൽ ഇടിമിന്നലിനും ശക്തമായ കാറ്റിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ഇന്നും നാളെയും ബെംഗളൂരു അർബൻ, ബെംഗളൂരു റൂറൽ ജില്ലകളിൽ ഇടിമിന്നലോടുകൂടിയ മഴ ലഭിക്കാനാണ് സാധ്യത.
കാലാവസ്ഥാ വകുപ്പിന്റെ കണക്കനുസരിച്ച് ഇന്ന് രാവിലെ 8.30-ന് അവസാനിച്ച 24 മണിക്കൂറിനിടെ ബെംഗളൂരു നഗരത്തിലെ കാലാവസ്ഥാ നിരീക്ഷണ കേന്ദ്രത്തിൽ 32 മില്ലിമീറ്റർ മഴ രേഖപ്പെടുത്തി. നഗരത്തിൽ മേഘാവൃതമായ കാലാവസ്ഥയും ഇടയ്ക്കിടെ മഴയും തുടരാൻ സാധ്യതയുണ്ട്.
ബെംഗളൂരു ഉൾപ്പെടുന്ന ദക്ഷിണ ഉൾനാടൻ കർണാടകയിൽ അടുത്ത ദിവസങ്ങളിലും മഴ സജീവമായിരിക്കുമെന്നാണ് പ്രവചനം. മൈസൂരു, ചാമരാജനഗർ, കുടക് തുടങ്ങിയ ജില്ലകളിലെ ചില പ്രദേശങ്ങളിൽ ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.ഒക്ടോബർ 18 മുതൽ 22 വരെയും ദക്ഷിണ ഉൾനാടൻ കർണാടകയിലെ ചില ഭാഗങ്ങളിൽ മഴ ലഭിച്ചേക്കും .
മഴയെ തുടർന്ന് റോഡുകളിൽ വെള്ളക്കെട്ട് രൂപപ്പെടാനും ഗതാഗതക്കുരുക്ക് വർധിക്കാനും സാധ്യതയുള്ളതിനാൽ വാഹനയാത്രക്കാർ ജാഗ്രത പാലിക്കണം. ഇടിമിന്നലുള്ള സമയത്ത് തുറസ്സായ സ്ഥലങ്ങളിൽ നിൽക്കുന്നതും മരങ്ങൾക്കടിയിൽ അഭയം തേടുന്നതും ഒഴിവാക്കണം. വൈദ്യുത ലൈനുകൾക്കും വീഴാൻ സാധ്യതയുള്ള മരങ്ങൾക്കും സമീപം നിൽക്കരുതെന്നും കാലാവസ്ഥാ വകുപ്പ് മുന്നറിയിപ്പ് നൽകി.
SUMMARY: Rain to continue in Bengaluru; warning issued for thunderstorms and strong winds—commuters advised to exercise caution.
