ബെംഗളൂരു: ആനേക്കലിൽ നിന്ന് തട്ടിക്കൊണ്ടുപോയ റിയൽ എസ്റ്റേറ്റ് വ്യാപാരിയെ തമിഴ്നാട്ടിലെ ഡെങ്കനിക്കോട്ടയ്ക്ക് സമീപം കൊല്ലപ്പെട്ട നിലയിൽ കണ്ടെത്തി. ഗോപാല് എന്ന 41 കാരനാണ് കൊലപ്പെട്ടത്. സംഭവത്തില് മോഹൻ ബാബു, ഇയാളുടെ രണ്ട് കൂട്ടാളികൾ എന്നിവരെ പോലീസ് കസ്റ്റഡിയിലെടുത്തു.
ഞായറാഴ്ച വൈകുന്നേരം ആനേക്കലിനടുത്തുള്ള കർപൂർ വില്ലേജ് ഗേറ്റിന് സമീപം ഒരു സംഘം കാർ തടഞ്ഞുനിർത്തി ഗോപാലിനെ തട്ടിക്കൊണ്ടുപോകുകയായിരുന്നു. അക്രമികൾ കാർ പിന്നിൽ നിന്ന് ഇടിച്ചുകയറ്റി ബലമായി മറ്റൊരു കാറിൽ കയറ്റി ഗോപാലിനെ കൊണ്ടുപോയി. പിന്നീട് ഡെങ്കനിക്കോട്ടൈയ്ക്ക് സമീപമുള്ള ഒരു വനപ്രദേശത്തേക്ക് കൊണ്ടുപോയി വെട്ടിക്കൊലപ്പെടുത്തുകയായിരുന്നു. തിങ്കളാഴ്ചയാണ് മൃതദേഹം കണ്ടെത്തിയത്.
പിടിയിലായ മോഹൻ ബാബുവിനെ ചോദ്യം ചെയ്തപ്പോള് ഗോപാലും താനും മുമ്പ് ബിസിനസ് പങ്കാളികളായിരുന്നുവെന്നും ബിസിനസിലെ തര്ക്കങ്ങള് ആണ് കൊലക്ക് കാരണമെന്നും മൊഴി നല്കിയതായി പോലീസ് അറിയിച്ചു. കേസില് കൂടുതൽ അന്വേഷണം നടക്കുകയാണ്.
SUMMARY: Real estate businessman kidnapped from Anekal found murdered in Tamil Nadu
