തിരുവനന്തപുരം: സംസ്ഥാന സർക്കാർ ജീവനക്കാർക്കും പെൻഷൻകാർക്കും 2 ശതമാനം ഡിഎ / ഡിആർ അനുവദിച്ചു. നവംബർ 1 ന് വിതരണം ചെയ്യുന്ന ശമ്പളത്തോടും പെൻഷനോടും ഒപ്പം 2 ശതമാനം ഡിഎ / ഡിആർ കൂടി ലഭിക്കും. 96 കോടി രൂപയാണ് 2 ശതമാനം ഡിഎ / ഡിആർ അനുവദിക്കുന്നതിലൂടെ പ്രതിമാസം അധിക ചെലവായി വരുന്നത്. ഇത് യാഥാര്‍ഥ്യമാകുന്നതോടെ ഡിഎ 37 ശതമാനമാകും.
സംസ്ഥാനത്തെ ലക്ഷക്കണക്കിന് വരുന്ന സർക്കാർ ജീവനക്കാർക്കും അധ്യാപകർക്കും സർവീസ് പെൻഷൻകാർക്കും ആശ്വാസമേകുന്നതാണ് സർക്കാരിൻ്റെ തീരുമാനം. നവംബർ ഒന്നിന് വിതരണം ചെയ്യേണ്ട ശമ്പള ബില്ലുകളിൽ പുതിയ ഡിഎ നിരക്കുകൾ ഉൾപ്പെടുത്തുന്നതിനായി ട്രഷറി- സ്പാർക്ക് സോഫ്റ്റ്‌വെയറുകളിൽ അടിയന്തര സാങ്കേതിക അപ്ഡേഷനുകൾ പൂർത്തിയാക്കാൻ ധനവകുപ്പ് നിർദ്ദേശം നൽകി.
ഡിഎ വിതരണത്തിൽ മുൻകാലങ്ങളിലുണ്ടായ വീഴ്ചകൾ പരിഹരിക്കപ്പെടുമെന്ന ഉറച്ച പ്രതീക്ഷയിലാണ് സർവീസ് സംഘടനകൾ. 2019 മുതലുള്ള ഒരു ഡിഎ ഗഡുവിന് പോലും മുൻ എൽഡിഎഫ് സർക്കാർ ജീവനക്കാർക്ക് കുടിശ്ശിക അനുവദിച്ചിരുന്നില്ലെന്നാണ് സംഘടനാ നേതാക്കളുടെ പരാതി. അധികാരത്തിലെത്തിയാൽ ഡിഎ കുടിശ്ശിക ഘട്ടംഘട്ടമായി അനുവദിക്കുമെന്ന് സർക്കാർ പ്രഖ്യാപിച്ചിരുന്നു. സർക്കാർ ജീവനക്കാരുടെയും അധ്യാപകരുടെയും ന്യായമായ അവകാശങ്ങൾ സംരക്ഷിക്കുമെന്നും ആനുകൂല്യങ്ങൾ തടഞ്ഞുവെക്കുന്ന സമീപനം സർക്കാരിനില്ലെന്നും മുഖ്യമന്ത്രി വി. ഡി. സതീശൻ അഭിപ്രായപ്പെട്ടിരുന്നു.
SUMMARY: Relief for government employees and pensioners; 2% DA and DR sanctioned.
