കൊല്ലം: ശബരിമല സ്വര്ണക്കൊള്ളക്കേസില് മുന് എക്സിക്യൂട്ടീവ് ഓഫീസര് സുധീഷ് കുമാറിന് ജാമ്യം. രണ്ട് കേസുകളിലും സ്വാഭാവിക ജാമ്യം ലഭിച്ചതോടെ സുധീഷ് കുമാര് ഇന്ന് ജയിലില് നിന്ന് പുറത്തിറങ്ങും. പാളികളില് സ്വര്ണം പൊതിഞ്ഞെന്ന് സുധീഷ് കുമാറിന് അറിവുണ്ടായിട്ടും ചെമ്പുപാളിയെന്ന് രേഖയുണ്ടാക്കാന് ഗൂഢാലോചന നടത്തിയെന്നാണ് സുധീഷ്കുമാറിനെതിരേയുള്ള കേസ്. റിമാന്ഡ് കാലാവധി 90 ദിവസം പിന്നിട്ടത് ചൂണ്ടിക്കാട്ടിയാണ് ജാമ്യാപേക്ഷ നല്കിയത്.
2019ല് ദ്വാരപാലക ശില്പങ്ങളിലെ പാളികള് സ്വര്ണം പൂശാന് ഉണ്ണികൃഷ്ണന് പോറ്റിക്ക് കൈമാറുമ്പോള് ശബരിമല എക്സിക്യൂട്ടീവ് ഓഫീസര് ആയിരുന്നു സുധീഷ് കുമാര്. ചെമ്പ് പാളികള് എന്ന് രേഖപ്പെടുത്തിയാണ് സുധീഷ് കുമാര് പോറ്റിയെ സ്പോണ്സര് ആക്കാമെന്ന ശുപാര്ശ ബോര്ഡിന് നല്കിയത്. അതേസമയം കട്ടിളപ്പാളി കേസില് ഉണ്ണികൃഷ്ണന് പോറ്റിയുടെ ജാമ്യാപേക്ഷയില് കൊല്ലം വിജിലന്സ് കോടതി ബുധനാഴ്ച വാദം കേള്ക്കും.
SUMMARY: Sabarimala gold theft case; Former executive officer Sudheesh Kumar granted bail
