പഹൽഗാം ഭീകരാക്രമണം; കൊല്ലപ്പെട്ട കർണാടക സ്വദേശികളുടെ കുടുംബത്തിന് നഷ്ടപരിഹാരം നൽകുമെന്ന് തേജസ്വി സൂര്യ എംപി

ബെംഗളൂരു: ജമ്മു കശ്മീരിലെ പഹൽഗാമിൽ അടുത്തിടെയുണ്ടായ ഭീകരാക്രമണത്തിൽ കൊല്ലപ്പെട്ട കർണാടക സ്വദേശികളുടെ കുടുംബത്തിന് നഷ്ടപരിഹാരം നൽകുമെന്ന്  തേജസ്വി സൂര്യ എംപി. കൊല്ലപ്പെട്ട ഭരത് ഭൂഷണിന്റെയും മഞ്ജുനാഥിന്റെയും കുടുംബങ്ങൾക്ക് ബിജെപി 10 ലക്ഷം രൂപ വീതം ധനസഹായം നൽകുമെന്ന് ബിജെപി യുവമോർച്ച ദേശീയ പ്രസിഡന്റ് കൂടിയായ തേജസ്വി സൂര്യ അറിയിച്ചു.

ഭീകരാക്രമണത്തെ അപലപിക്കാൻ ബെംഗളൂരു സൗത്തിൽ പ്രതിഷേധ മാർച്ച് സംഘടിപ്പിക്കുമെന്നും സൂര്യ അറിയിച്ചു. സംസ്ഥാന സർക്കാർ നൽകുന്ന നഷ്ടപരിഹാരത്തിന് പുറമെ കുടുംബങ്ങൾക്ക് അധികമായി ധനസഹായം നൽകാൻ പ്രമുഖർ മുന്നോട്ട് വരണമെന്ന് അദ്ദേഹം പറഞ്ഞു.

കൊല്ലപ്പെട്ട മഞ്ജുനാഥിന്റെ മകൻ അഭിജയയുടെ ബി.കോം, ബിരുദാനന്തര പഠനത്തിനുള്ള മുഴുവൻ വിദ്യാഭ്യാസ ചെലവുകളും വഹിക്കാൻ ആർവി സർവകലാശാല സമ്മതിച്ചതായും അദ്ദേഹം പറഞ്ഞു. ഇരകളുടെ കുടുംബങ്ങളിലെ അമ്മയ്ക്കും കുഞ്ഞിനും അടുത്ത പതിനൊന്ന് വർഷത്തേക്ക് പൂർണ്ണമായും സൗജന്യ ചികിത്സകൾ നൽകുമെന്ന് ശ്രീ ഭഗവാൻ മഹാവീർ ജെയിൻ ആശുപത്രി അധികൃതർ അറിയിച്ചു.

TAGS: KARNATAKA | TERROR ATTACK
SUMMARY: Tejasvi Surya announces Rs 10 Lakh support for families of Pahalgam attack victims from Karnataka