ബെംഗളൂരു: അമിതവേഗതയിൽ വന്ന ടിപ്പർ ലോറി സ്കൂട്ടറിൽ ഇടിച്ചുകയറി എംബിബിഎസ് വിദ്യാർഥിനിക്ക് ദാരുണാന്ത്യം. ഒപ്പമുണ്ടായിരുന്ന സുഹൃത്തിന് പരുക്കേറ്റു. ബെംഗളൂരു സ്വദേശിനിയും രാജരാജേശ്വരി മെഡിക്കൽ കോളേജ് ആൻഡ് ഹോസ്പിറ്റലിലെ (ആർആർഎംസിഎച്ച്) അവസാന വര്ഷ എംബിബിഎസ് വിദ്യാർഥിനിയുമായ കൃതിക (21) ആണ് മരിച്ചത്. മൈസൂർ റോഡിൽ ബുധനാഴ്ച വൈകുന്നേരം 4.15 ഓടെയാണ് അപകടം. സ്കൂട്ടർ ഓടിച്ചിരുന്ന ഹൻസയെ പരുക്കുകളോടെ ആശുപത്രിയിൽ പ്രവേശിപ്പിച്ചു.
വൈകുന്നേരം ക്ലാസ് കഴിഞ്ഞ് ഇരുവരും കോളേജ് ഗേറ്റിൽ നിന്ന് പുറത്തിറങ്ങുമ്പോഴാണ് അപകടം. മൈസൂരിലേക്ക് പോകുന്നതിനായി ഹൻസ പ്രധാന റോഡിലേക്ക് പ്രവേശിക്കാൻ ശ്രമിക്കുന്നതിനിടെ അതിവേഗത്തില് എത്തിയ ടിപ്പർ ലോറി സ്കൂട്ടറില് ഇടിക്കുകയായിരുന്നു. വഴിയാത്രക്കാരും കോളേജ് ജീവനക്കാരും ചേര്ന്ന് ഇരുവരെയും ആർആർഎംസിഎച്ച് എമർജൻസി വാർഡിലേക്ക് കൊണ്ടുപോയെങ്കിലും കൃതികയെ രക്ഷപ്പെടുത്താനായില്ല.
സംഭവത്തില് കെങ്കേരി ട്രാഫിക് പോലീസ് കേസെടുത്തു. ടിപ്പർ ലോറി കസ്റ്റഡിയിലെടുത്തു. ഡ്രൈവറെ ചോദ്യം ചെയ്തുവരികയാണ്.
SUMMARY: Tipper lorry hits scooter. MBBS student dies, friend injured
