യുഡിഎഫ് ട്രാൻസ്‌വുമണ്‍ അരുണിമ എം. കുറുപ്പിന് മത്സരിക്കാം; നാമനിര്‍ദേശ പത്രിക സ്വീകരിച്ചു

ആലപ്പുഴ: ആലപ്പുഴ ജില്ലാ പഞ്ചായത്ത് വയലാർ ഡിവിഷനിലേക്ക് യുഡിഎഫ് സ്ഥാനാർഥിയായി മത്സരിക്കുന്ന ട്രാൻസ്‌വുമണ്‍ അരുണിമ എം. കുറുപ്പിന്റെ സ്ഥാനാർഥിത്വം അംഗീകരിച്ചു. സൂക്ഷ്മ പരിശോധനയില്‍ നാമനിർദേശ പത്രിക സ്വീകരിച്ചതോടെ ഇതുമായി ബന്ധപ്പെട്ടുണ്ടായിരുന്ന എല്ലാ ആശങ്കകളും അനിശ്ചിതത്വങ്ങളും നീങ്ങി.

ഇതോടെ അരുണിമയ്ക്ക് നിയമപരമായി മത്സരരംഗത്ത് തുടരാം. അരുണിമയുടെ വോട്ടർ ഐഡി ഉള്‍പ്പെടെയുള്ള ഔദ്യോഗിക രേഖകളില്‍ ‘സ്ത്രീ’ എന്നാണ് രേഖപ്പെടുത്തിയിരിക്കുന്നത്. അതിനാല്‍, വനിതാ സംവരണ സീറ്റായ വയലാർ ഡിവിഷനില്‍ മത്സരിക്കുന്നതിന് നിയമപരമായി യാതൊരു തടസ്സവുമില്ലെന്ന് വരണാധികാരികള്‍ സ്ഥിരീകരിച്ചു. പത്രിക സൂക്ഷ്മപരിശോധനയില്‍ ആരും എതിർപ്പ് ഉന്നയിച്ചിരുന്നില്ല.

യുഡിഎഫ് വനിതാ സംവരണ സീറ്റില്‍ ട്രാൻസ്‌വുമണിനെ മത്സരിപ്പിക്കുന്നു എന്ന വാർത്ത കഴിഞ്ഞ ദിവസങ്ങളില്‍ വലിയ ചർച്ചയായിരുന്നു. എന്നാല്‍, തന്റെ രേഖകളെല്ലാം സ്ത്രീ എന്ന വിഭാഗത്തില്‍ ആയതിനാല്‍ മത്സരത്തിന് നിയമതടസ്സമില്ലെന്നും പാർട്ടിയുടെ പൂർണ പിന്തുണയുണ്ടെന്നും അരുണിമ നേരത്തെ പ്രതികരിച്ചിരുന്നു. നാമനിർദേശ പത്രിക അംഗീകരിച്ചതോടെ, വയലാർ ഡിവിഷനില്‍ ചരിത്രപരമായ ഒരു പോരാട്ടത്തിന് കളമൊരുങ്ങുകയാണ്.

SUMMARY: UDF transwoman Arunima M. Kurup can contest; nomination papers accepted