ബെംഗളൂരുവിൽ വേനൽക്കാലം ഇത്തവണ നേരത്തെ; ജലക്ഷാമം രൂക്ഷമാകാൻ സാധ്യത

ബെംഗളൂരു: ബെംഗളൂരുവിൽ ഇത്തവണ വേനൽക്കാലം നേരത്തെയെന്ന് കാലാവസ്ഥ നിരീക്ഷണ കേന്ദ്രം (ഐഎംഡി). ശൈത്യകാലം നേരത്തെ തീർന്ന് വേനലിനു വഴിയൊരുക്കുകയാണ് നഗരത്തിലെ കാലാവസ്ഥ. വരുന്ന ദിവസങ്ങളിലും താപനില വർധിക്കുവാനുള്ള സാധ്യതയുള്ളതായി ഐഎംഡി അറിയിച്ചിട്ടുണ്ട്.

വേനൽക്കാലം എത്തുന്നതോടെ വരൾച്ചയ്ക്കുള്ള സാധ്യതയും കൂടിയിട്ടുണ്ട്. കഴിഞ്ഞ വർഷത്തെ അപേക്ഷിച്ച് ഇത്തവണ ജലക്ഷാമം രൂക്ഷമായെക്കുമെന്ന് കാലാവസ്ഥ വിദഗ്ധർ നേരത്തേ സൂചന നൽകിയിട്ടുണ്ട്. ഭൂഗർഭജലചൂഷണം നഗരത്തിൽ ദിനേന വർധിക്കുകയാണ്. ഇക്കാരണത്താൽ തന്നെ കടുത്ത ജലക്ഷാമം നഗരത്തിൽ ഉണ്ടായേക്കാൻ സാധ്യതയും കൂടുതലാണ്.

ഈ വര്‍ഷം ഇതുവരെ രേഖപ്പെടുത്തിയതിൽ ഏറ്റവും കൂടുതൽ താപനില ഫെബ്രുവരി 12ന് ആയിരുന്നു. 33.6 ഡിഗ്രി ആണ് നഗരത്തിൽ അന്നനുഭവപ്പെട്ടത്. സാധാരണ ഏപ്രിൽ മാസത്തിലാണ് ഇത്തരം അവസ്ഥയിലേക്ക് പോകുന്നതെങ്കിലും ഈ വർഷം ജനുവരി അവസാനം മുതലേ നഗരത്തിൽ ചൂട് വർധിച്ചു തുടങ്ങിയിട്ടുണ്ട്. ഏപ്രിൽ മാസത്തിലെ ചൂട് ഫെബ്രുവരിയിൽ തന്നെ നഗരത്തിൽ ഇത്തവണ രേഖപ്പെടുത്തി.

ബെംഗളൂരു, ബാഗൽകോട്ട്, ധാർവാഡ്, ഗദഗ്, മാണ്ഡ്യ, കലബുർഗി, ചിത്രദുർഗ, ദാവൻഗരെ, ചിന്താമണി, മൈസൂരു എന്നിവയുൾപ്പെടെ പല പ്രദേശങ്ങളിലും താപനില കൂടുതലാണ്.

TAGS: BENGALURU
SUMMARY: Hot days to comeup in city soon this year