ബെംഗളൂരു: പ്രമുഖ കന്നഡ എഴുത്തുകാരി സി.എൻ. മുക്ത (കല്ലെമ്പെല്ല നരംസിഹമൂർത്തി മുക്ത-75) അന്തരിച്ചു. വെള്ളിയാഴ്ച രാവിലെ നഗരത്തിലെ സ്വകാര്യ ആശുപത്രിയിലായിരുന്നു അന്ത്യം. ദീർഘനാളായി മൈസൂരുവിലെ വീട്ടിൽ വിശ്രമത്തിലായിരുന്നു. സംസ്കാരം ശനിയാഴ്ച ഉച്ചകഴിഞ്ഞ് ചാമുണ്ഡി കുന്നിന്റെ താഴ്വരയിലുള്ള വൈദ്യുത ശ്മശാനത്തിൽ നടക്കുമെന്ന് ബന്ധുക്കൾ അറിയിച്ചു.
കന്നഡ ഭാഷയിൽ 75-ലധികം നോവലുകളും 15-ലധികം ചെറുകഥാ സമാഹാരങ്ങളും എഴുതിയിട്ടുണ്ട്. സുഖദ സോപാന, ക്ഷമാ ധരിത്രി, ദാദാ സെറിദാ നൗകെ, ജീവന ചക്ര, അമൃതമയി, വിമുക്തി എന്നിവ അവരുടെ പ്രശസ്ത നോവലുകളിൽ ചിലതാണ്.വിമുക്തി എന്ന നോവലിനെ ആസ്പദമാക്കി ‘ഡോണി സാഗലി’, മേഘ മന്ദാര എന്ന നോവലിനെ ആസ്പദമാക്കി ‘മിസ് കാലിഫോർണിയ’എന്നീ ചിത്രങ്ങളും കന്നഡ ഭാഷയിൽ പുറത്തിറങ്ങിയിട്ടുണ്ട്.
കന്നഡ സാഹിത്യത്തിന് നൽകിയ സമഗ്രസംഭാവനകൾ പരിഗണിച്ച് സംസ്ഥാന സർക്കാർ കർണാടക രാജ്യോത്സവ്, അട്ടിമാബ്ബെ തുടങ്ങി ഒട്ടേറെ പുരസ്കാരങ്ങൾ നൽകി ആദരിച്ചിട്ടുണ്ട്.
SUMMARY: Renowned Kannada writer C.N. Mukta passes away
