ബെംഗളൂരു: ബെംഗളൂരു ജില്ലാ എസ്‌കെഎസ്എസ്എഫ് കമ്മിറ്റിയുടെ നേതൃത്വത്തില്‍ സമസ്ത കേരള ജംയിയ്യത്തുല്‍ ഉലമ ജനറല്‍ സെക്രട്ടറി ആയിരുന്ന ശൈഖുനാ ആലിക്കുട്ടി ഉസ്താദിന്റെ നിര്യാണത്തില്‍ അനുസ്മരണവും പ്രാര്‍ത്ഥനാ സംഗമവും നടത്തി. എസ്‌കെഎസ്എസ്എഫ് നാഷണല്‍ വൈസ് പ്രസിഡന്റ് സയ്യിദ് മുബഷിര്‍ തങ്ങള്‍ ജമലുല്ലൈലി അനുസ്മരണ പരിപാടി ഉദ്ഘാടനം ചെയ്തു.സമസ്ത കേരള ജംയിയ്യത്തുല്‍ ഉലമ എന്ന പ്രസ്ഥാനത്തിന്റെ വളര്‍ച്ചയിലും മതവിദ്യാഭ്യാസ മേഖലയിലും ജീവിതം സമര്‍പ്പിച്ച നേതാവായിരുന്നു ആലിക്കുട്ടി ഉസ്താദ് എന്ന് യോഗം അനുസ്മരിച്ചു.
എസ്‌കെഎസ്എസ്എഫ് നാഷണല്‍ ജനറല്‍ സെക്രട്ടറി അസ്ലം ഫൈസി, സി സി അംഗം സുഹൈല്‍ ഫൈസി, എസ് കെ ജെ എം പ്രസിഡന്റ് റസാഖ്‌ഫൈസി തുടങ്ങിയവര്‍ സംസാരിച്ചു. സമസ്ത നൂറാം വാര്‍ഷിക മഹാ സമ്മേളനത്തിന്റെ പ്രചാരണാര്‍ഥം സംഘടിപ്പിക്കപ്പെട്ട സന്ദേശയാത്രയില്‍ സ്ഥിരം അംഗങ്ങളായി ബെംഗളൂരുവിനെ പ്രതിനിധീകരിച്ചു പങ്കെടുത്തവരെയും നൂറാം വാര്‍ഷിക സമാപന സമ്മേളനത്തിന്റെ സംഘാടക സമിതി അംഗങ്ങളെയും യോഗത്തില്‍ ആദരിച്ചു .സയ്യിദ് മുബഷിര്‍ തങ്ങള്‍ ജമലുല്ലൈലി തുടര്‍ന്ന് നടന്ന പ്രാര്‍ത്ഥനാ സംഗമത്തിന് നേതൃത്വം നല്‍കി. കെ ജുനൈദ് യെശ്വന്ത്പുര അധ്യക്ഷത വഹിച്ചു. കെ കെ സലീം സ്വാഗതവും സി എച്ച് ഷാജല്‍ നന്ദിയും പറഞ്ഞു.
SUMMARY: Alikutty Ustad Remembrance and Prayer Gathering
