കാഠ്മണ്ഡു: നേപ്പാളില്‍ വീശിയടിച്ച പ്രളയദുരന്തത്തില്‍ കുടുങ്ങിയ അഞ്ച് വയസ്സുകാരനായ കുട്ടി ഉള്‍പ്പെടെ മൂന്ന് ഇന്ത്യൻ പൗരന്മാരെ സുരക്ഷിതമായി രക്ഷപ്പെടുത്തി. ത്രിശൂലി ബസാർ മേഖലയില്‍ നിന്നാണ് അഭിജിത്ത് സുരേഷ് പവാർ, ദീപിക അഭിജിത്ത് പവാർ, അഞ്ച് വയസ്സുകാരനായ സമർത്ഥ് അഭിജിത്ത് പവാർ എന്നിവരെ രക്ഷാസേന കണ്ടെത്തിയത്. ഇതോടെ ദുരന്തഭൂമിയില്‍ നിന്ന് ഇതുവരെ രക്ഷപ്പെടുത്തിയ ഇൻന്ത്യക്കാരുടെ എണ്ണം 169 ആയി ഉയർന്നു.
അതേസമയം, പ്രളയത്തില്‍ കാണാതായ 275 ഇന്ത്യൻ പൗരന്മാർക്കായി ഇപ്പോഴും തിരച്ചില്‍ തുടരുകയാണെന്ന് വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചു. കാണാതായവരെ കണ്ടെത്താൻ നേപ്പാള്‍ ദുരന്തനിവാരണ സേനയുമായി ചേർന്ന് വിപുലമായ തിരച്ചില്‍ പുരോഗമിക്കുകയാണെന്ന് വിദേശകാര്യ മന്ത്രാലയ വക്താവ് രണ്‍ധീർ ജയ്സ്വാള്‍ അറിയിച്ചു. കഴിഞ്ഞ ദിവസം പുറത്തുവിട്ട പ്രാഥമിക സര്‍ക്കാര്‍ റിപോര്‍ട്ട് പ്രകാരം, 32,933 പേരെയാണ് പ്രളയം ബാധിച്ചത്.
റോഡുകള്‍, പാലങ്ങള്‍, സ്‌കൂളുകള്‍, ആരോഗ്യകേന്ദ്രങ്ങള്‍ തുടങ്ങിയ അടിസ്ഥാന സൗകര്യങ്ങള്‍ക്കും വ്യാപക നാശനഷ്ടമുണ്ടായി. നാല് ആരോഗ്യകേന്ദ്രങ്ങള്‍ പൂര്‍ണമായും മൂന്ന് ആരോഗ്യകേന്ദ്രങ്ങള്‍ ഭാഗികമായും തകര്‍ന്നു. ഏകദേശം 55 കിലോമീറ്റര്‍ റോഡുകളും 37 വാഹനഗതാഗത പാലങ്ങളും 68 തൂക്കുപാലങ്ങളും പൂര്‍ണമായും തകര്‍ന്നതായി ദേശീയ ദുരന്ത നിവാരണ അതോറിറ്റി അറിയിച്ചു. നിലവില്‍ നാശനഷ്ടത്തിന്റെ ഔദ്യോഗിക കണക്ക് പൂര്‍ത്തിയായിട്ടില്ല.
SUMMARY: Nepal floods: 3 Indians, including a 5-year-old boy, rescued
