ന്യൂഡൽഹി: രാജേന്ദ്ര ആർലേക്കറെ കേരള ഗവർണർ സ്ഥാനത്ത് നിന്ന് മാറ്റി തമിഴ്നാട് ഗവർണറായി നിയമിച്ചു. ഓംപ്രകാശ് മാത്തൂരാണ് കേരളത്തിന്റെ പുതിയ ഗവർണർ. നിലവിൽ സിക്കിം ഗവർണറാണ് മാത്തൂർ. രാജസ്ഥാനിലെ പാലി ജില്ലയിൽ ജനിച്ച ഓംപ്രകാശ് മാത്തൂർ ആർ.എസ്.എസ് പ്രചാരകനായാണ് രാഷ്ട്രീയ ജീവിതം ആരംഭിച്ചത്. രാജസ്ഥാനിൽ നിന്നുള്ള രാജ്യസഭാംഗമായും ബി.ജെ.പി സംസ്ഥാന അദ്ധ്യക്ഷനായും പ്രവർത്തിച്ചിട്ടുണ്ട്.
6 സംസ്ഥാനങ്ങളിലെ ഗവർണർമാരെയാണ് മാറ്റിയത്. രാഷ്ട്രപതി ഭവനിൽനിന്ന് പുറത്തിറക്കിയ ഔദ്യോഗിക വാർത്താക്കുറിപ്പിലാണ് പുതിയ ഗവർണർമാരുടെ നിയമനം സംബന്ധിച്ച ഉത്തരവുകൾ കൈമാറിയത്. ചുമതലയേൽക്കുന്ന തീയതി മുതൽ പുതിയ നിയമനങ്ങൾ നിലവിൽവരുമെന്ന് രാഷ്ട്രപതിയുടെ ഓഫീസ് അറിയിച്ചു.
ഡോ. സുധ യാദവാണ് കർണാടകത്തിന്റെ പുതിയ ഗവർണർ. ദുഷ്യന്ത് ഗൗതം സിക്കിമിലും, ബ്രജ് മോഹൻ റാം ഒഡിഷയിലും ഗവർണറാകും. ധാൽ സിംഗ് ബിസേനിനെ ഉത്തരഖണ്ഡ് ഗവർണറായും നിയമിച്ചു.
മഹേന്ദ്രഗഢിലെ മുൻ എംപിയാണ് ഡോ സുധ യാദവ്. ഐഐടി റൂർക്കിയിൽ (IIT Roorkee) നിന്നുള്ള ഗോൾഡ് മെഡൽ ജേതാവാണ്. രസതന്ത്രത്തിൽ ഡോക്ടറേറ്റും (Ph.D.) നേടിയിട്ടുണ്ട്. 1999-ലെ കാർഗിൽ യുദ്ധത്തിൽ രാജ്യത്തിനായി ജീവൻ വെടിഞ്ഞ ഡെപ്യൂട്ടി കമാൻഡന്റ് സുഖ്ബീർ സിംഗ് യാദവിന്റെ പത്നിയാണ്. കാർഗിൽ യുദ്ധത്തിന് തൊട്ടുപിന്നാലെ 1999-ൽ നടന്ന ലോക്‌സഭാ തെരഞ്ഞെടുപ്പിൽ ബി.ജെ.പി. സ്ഥാനാർത്ഥിയായി മഹേന്ദ്രഗഢ് മണ്ഡലത്തിൽ നിന്ന് വിജയിച്ച് പാർലമെന്റിലെത്തി. ദേശീയ വനിതാ കമ്മീഷൻ അംഗം, ബി.ജെ.പി. ദേശീയ സെക്രട്ടറി തുടങ്ങിയ പദവികളും വഹിച്ചിട്ടുണ്ട്.
SUMMARY: Omprakash Mathur to become Governor of Kerala; Rajendra Arlekar to Tamil Nadu; Sudha Yadav to be Governor of Karnataka.
