കൊല്ലം: കേരളത്തിലെ ട്രെയിൻ യാത്രക്കാർക്കും വിനോദസഞ്ചാരികള്‍ക്കും അതിരറ്റ ആവേശവും വലിയൊരത്ഭുതവും സമ്മാനിച്ചുകൊണ്ട് ദക്ഷിണ റെയില്‍വേയുടെ ചരിത്രത്തിലെ തന്നെ ആദ്യ വിന്ഡോ കോച്ച്‌ സർവീസ് കേരളത്തില്‍ ആരംഭിക്കുന്നു. പ്രകൃതിഭംഗിയാല്‍ സമൃദ്ധമായ പുനലൂർ – ചെങ്കോട്ട റൂട്ടിലാണ് ഈ വിസ്റ്റാഡോം ട്രെയിൻ കേരളത്തില്‍ ആദ്യമായി സർവീസ് നടത്തുന്നത്.
ഒക്ടോബർ 22 മുതല്‍ ജനുവരി 16 വരെയാണ് ഈ പ്രത്യേക സർവീസ് ദക്ഷിണ റെയില്‍വേ ക്രമീകരിച്ചിരിക്കുന്നത്. പടിഞ്ഞാറൻ ഘട്ട മലനിരകളുടെയും തുരങ്കങ്ങളുടെയും പാലങ്ങളുടെയും പച്ചപ്പിന്റെയും വശ്യമായ ഭംഗി പൂർണ്ണമായി ആസ്വദിക്കാൻ സാധിക്കുന്ന രീതിയിലാണ് വിസ്റ്റാഡോം കോച്ചുകള്‍ രൂപകല്‍പ്പന ചെയ്തിരിക്കുന്നത്. 360-ഡിഗ്രി റിവോള്‍വിംഗ് സീറ്റുകളാണ് വിസ്റ്റാഡോം ട്രെയിനിൻ്റെ ഏറ്റവും വലിയ പ്രത്യേകത.
വശങ്ങളിലെ വലിയ ഗ്ലാസ് ജനലുകള്‍ക്ക് പുറമെ ട്രെയിനിന്റെ മേല്‍ക്കൂരയിലും സുതാര്യമായ ഗ്ലാസ് പാനലുകള്‍ നല്‍കിയിട്ടുണ്ട്. ഓട്ടോമാറ്റിക് സ്ലൈഡിംഗ് വാതിലുകള്‍, വൈഫൈ, ഡിജിറ്റല്‍ ഡിസ്‌പ്ലേ ബോർഡുകള്‍, മിനി പാൻട്രി, എല്‍.ഇ.ഡി ലൈറ്റുകള്‍ തുടങ്ങിയവും ഈ ട്രെയിനിൻ്റെ പ്രത്യേകതയാണ്. മധുര-ഗുരുവായൂർ എക്സ്പ്രസില്‍ വിസ്റ്റാഡോം കോച്ച്‌ അനുവദിച്ചതായി കൊടിക്കുന്നില്‍ സുരേഷ് എംപി തൻ്റെ സോഷ്യല്‍ മീഡിയില്‍ പറഞ്ഞിരുന്നു.
ഇതാദ്യമായാണ് കേരളത്തില്‍ ഒരു ട്രെയിനില്‍ വിസ്റ്റാഡോം കോച്ച്‌ യാഥാർത്ഥ്യമാകുന്നത്. യാത്രക്കാർക്ക് പ്രകൃതിഭംഗി ആസ്വദിച്ചുകൊണ്ട് യാത്ര ചെയ്യാൻ അവസരമൊരുക്കുന്ന ഈ സംവിധാനം കേരളത്തിലെ റെയില്‍വേ യാത്രാനുഭവത്തിന് പുതിയ വഴിയൊരുക്കും എന്നാണ് പ്രതീക്ഷ.
SUMMARY: First-ever Vistadome train in Kerala; to run on the Sengottai route from October 22 to January 16
