തിരുവനന്തപുരം: കോവളത്ത് ആന്ധ്രാ സ്വദേശിയായ 16 വയസ്സുള്ള പെണ്‍കുട്ടി സ്പായില്‍ ക്രൂരമായ ലൈംഗിക പീഡനത്തിനിരയായ സംഭവത്തില്‍ സംസ്ഥാന ബാലാവകാശ സംരക്ഷണ കമ്മീഷൻ സ്വമേധയാ കേസെടുത്തു. മാധ്യമ വാർത്തകളുടെ അടിസ്ഥാനത്തില്‍ കമ്മീഷൻ അംഗം ആണ് കേസ് രജിസ്റ്റർ ചെയ്തത്.
സംഭവത്തില്‍ തിരുവനന്തപുരം ജില്ലാ പോലീസ് മേധാവി, തിരുവനന്തപുരം മുനിസിപ്പല്‍ കോർപ്പറേഷൻ സെക്രട്ടറി, ജില്ലാ ശിശു സംരക്ഷണ ഓഫീസർ എന്നിവരോട് അടിയന്തരമായി അന്വേഷണ റിപ്പോർട്ട് സമർപ്പിക്കാൻ കമ്മീഷൻ ആവശ്യപ്പെട്ടിട്ടുണ്ട്. മാതാപിതാക്കളുടെ അഭാവത്തില്‍ കുട്ടിയുടെ സംരക്ഷണം ഏറ്റെടുത്ത ഇളയമ്മയും ഭർത്താവും ചേർന്ന് ഇതിനുമുമ്പ് മറ്റ് നഗരങ്ങളില്‍ കുട്ടിയെ എത്തിച്ചിരുന്നതായി അന്വേഷണസംഘത്തിന് വിവരം ലഭിച്ചിട്ടുണ്ട്.
പെണ്‍കുട്ടിയെ പാർപ്പിച്ചിരുന്ന മസാജിങ് സെന്ററിന്റെ ഉടമയെ കേന്ദ്രീകരിച്ചും അന്വേഷണം ഊർജിതമാക്കി. തിരുവനന്തപുരം നഗരസഭയിലെ ജൂനിയർ ഹെല്‍ത്ത് ഇൻസ്പെക്ടറായ ഇയാള്‍ ബിനാമി പേരിലാണ് സ്ഥാപനം നടത്തിയിരുന്നതെന്നാണ് പോലീസിന്റെ കണ്ടെത്തല്‍. സംഭവത്തില്‍ മുഖ്യപ്രതികളായ പെണ്‍കുട്ടിയുടെ ഇളയമ്മയെയും ഭർത്താവിനെയും ഇന്നലെ ആന്ധ്രാപ്രദേശില്‍ നിന്ന് കോവളം പോലീസ് കസ്റ്റഡിയിലെടുത്തിരുന്നു.
ഇരുവരെയും ഇന്ന് തിരുവനന്തപുരത്ത് എത്തിക്കും. കേസിന്റെ പശ്ചാത്തലത്തില്‍ കോവളം ബീച്ച്‌ കേന്ദ്രീകരിച്ചുള്ള അനധികൃത സ്പാ കേന്ദ്രങ്ങളില്‍ പരിശോധന തുടരാനാണ് പോലീസിന്റെ തീരുമാനം.
SUMMARY: Kovalam Spa Abuse Case: Commission for Protection of Child Rights Registers Suo Motu Case
