ഏഷ്യൻ പാരാ ഗെയിംസ്; ഷൂട്ടിങ്ങില്‍ ഇന്ത്യയ്ക്ക് സ്വര്‍ണവും വെള്ളിയും

നഗോയ: 2026-ലെ ഏഷ്യൻ പാര ഗെയിംസിന്റെ ആദ്യ ദിനത്തില്‍ തന്നെ ചരിത്രനേട്ടങ്ങളോടെ മിന്നും തുടക്കം കുറിച്ച്‌ ഇന്ത്യൻ താരങ്ങള്‍. വനിതകളുടെ 10 മീറ്റർ എയർ റൈഫിള്‍ ഷൂട്ടിങ് ഫൈനലില്‍ സ്വർണ്ണവും വെള്ളിയും സ്വന്തമാക്കി ഇന്ത്യൻ ഷൂട്ടർമാർ അഭിമാനനേട്ടം കുറിച്ചപ്പോള്‍, പാര ആർച്ചറിയില്‍ ലോക റെക്കോർഡിനൊപ്പമെത്തി ശീതള്‍ ദേവി ഇന്ത്യയുടെ ആദ്യദിനം ആഘോഷമാക്കി മാറ്റി.

വനിതകളുടെ 10 മീറ്റർ എയർ റൈഫിള്‍ എസ്.എച്ച്‌1 (SH1) ഇനത്തില്‍ റിക്കോർഡ് പ്രകടനത്തോടെ മോന അഗർവാളാണ് ഇന്ത്യയ്ക്കായി ആദ്യ സ്വർണ്ണം എയ്തുവീഴ്ത്തിയത്. 250 പോയിന്റുകള്‍ നേടി ഗെയിംസ് റിക്കോർഡോടെയാണ് മോനയുടെ നേട്ടം. കടുത്ത പോരാട്ടം നടന്ന ഫൈനലില്‍ 249.6 പോയിന്റുകളോടെ പാരലിമ്പിക്സ് സ്വർണ്ണമെഡല്‍ വിജയിയായ സൂപ്പർ താരം അവനി ലേഖര വെള്ളി മെഡല്‍ സ്വന്തമാക്കി. കേവലം 0.4 പോയിന്റുകളുടെ വ്യത്യാസത്തിലാണ് മോന ഒന്നാമതെത്തിയത്.

പുരുഷ വിഭാഗം റൈഫിള്‍ ഫൈനലില്‍ ഇന്ത്യയുടെ സ്വരൂപ് ഉൻഹാള്‍ക്കറും രാകേഷ് നിഡഗുണ്ടിയും മികച്ച പോരാട്ടം കാഴ്ചവെച്ചെങ്കിലും നാലാം സ്ഥാനത്താണ് ഫിനിഷ് ചെയ്തത്.

SUMMARY: Asian Para Games: India wins gold and silver in shooting