ബെംഗളുരു : വിസ്ഡം ഇസ്ലാമിക് ഓർഗനൈസേഷൻ ജൂലൈ 21 ന് ബെംഗളുരുവിലെ പാലസ് ഗ്രൗണ്ടിലെ നാലപ്പാട് പാവലിയനിൽ വിശ്വാസ വിശുദ്ധി, സംതൃപ്ത കുടുംബം എന്ന പ്രമേയത്തിൽ സംഘടിപ്പിക്കുന്ന ഫാമിലി കോൺഫറൻസിന് മുന്നോടിയായി തസ്‌ഫിയ ഫാമിലി മീറ്റ് സംഘടിപ്പിച്ചു. ഹെഗ്‌ഡെ നഗറിലെ എസ്.കെ.എഫ് ഹാളിൽ നടന്ന പരിപാടി വിസ്ഡം സംസ്ഥാന സെക്രട്ടറി ഹാരിസ് കായകൊടി ഫാമിലി മീറ്റ് ഉദ്ഘാടനം ചെയ്തു.
മതരാഹിത്യത്തിലൂടെ അരാജകത്വത്തിന്റെ കെട്ടുകൾ അഴിച്ചുവിടാനുള്ള ശ്രമങ്ങൾ കെട്ടുറപ്പുള്ള കുടുംബങ്ങളുടെ തകർച്ചയിലാണ് പര്യവസാനിക്കുക. മതപരമായ അറിവും ബോധവും ഉള്ള സമൂഹത്തിന് മാത്രമേ കെട്ടുറപ്പുള്ള കുടുംബങ്ങളെ പടുത്തുയർത്താൻ സാധിക്കുകയുള്ളൂ എന്ന് ഹാരിസ് കായക്കൊടി പറഞ്ഞു.
വിസ്ഡം ബെംഗളുരു സെക്രട്ടറി ഹാരിസ് ബന്നൂർ അധ്യക്ഷത വഹിച്ചു. ഹെഗ്‌ഡെ നഗർ ഏരിയ ട്രഷറർ റഹ്മത്ത് അലി സ്വാഗതം പറഞ്ഞു. സുൽനൂറയിൻ മസ്ജിദ് ഖത്തീബ് മുബാറക് അല് ഹികമി, ഏരിയ ഭാരവാഹികളായ ഷുഹൈബ്, അജ്മൽ ജമാൽ എന്നിവർ നേതൃത്വം നൽകി.
ഈ മാസം 21ന് നടത്തുന്ന ബെംഗളൂരു മലയാളി ഫാമിലി കോൺഫറൻസിൽ പ്രമുഖ മലയാളി പണ്ഡിതന്മാരായ പി.എൻ അബ്ദുൽ ലത്തീഫ് മദനി, ടി. കെ അഷ്‌റഫ്‌, ഹാരിസ് ബിൻ സലിം, ഹുസൈൻ സലഫി എന്നിവരോടൊപ്പം മത രാഷ്ട്രിയ രംഗത്തെ പ്രമുഖർ പങ്കെടുക്കും. 5000 ത്തോളം ആളുകൾ പങ്കെടുക്കുന്ന ഫാമിലി കോൺഫറൻസിന് മുന്നോടിയായി ബെംഗളുരുവിലെ എല്ലാ മണ്ഡലങ്ങളിലും ശാഖകളിലും വ്യത്യസ്തമായ പ്രചാരണ പരിപാടികൾ സംഘടിപ്പിച്ചിട്ടുണ്ട്. അയൽക്കൂട്ടങ്ങൾ, കുടുംബ സംഗമങ്ങൾ, സ്നേഹ യാത്രകൾ, വാഹന പ്രചരണം തുടങ്ങിയ വിവിധ പരിപാടികൾ നടന്നു വരുന്നുണ്ട്.
<Br>
TAGS : WISDOM FAMILY CONFERENCE
SUMMARY : Wisdom Family Conference. Tasfia organized a family meet
