ബെംഗളൂരു: കേരളത്തിലേക്കുള്ള ഓണം സ്പെഷ്യൽ ട്രെയിൻ പ്രഖ്യാപനം നേരത്തെയാക്കണമെന്നുള്ള ആവശ്യങ്ങളടക്കം ഉന്നയിച്ച് കർണാടക കേരള ട്രാവലേഴ്സ് ഫോറം പ്രതിനിധികൾ റെയിൽവേ റെയിൽവേ ഡിവിഷണൽ ഓപ്പറേഷൻസ് മാനേജർ (ഡിഒഎം) നൈനി ശ്രീ രംഗനാഥ് റെഡ്ഡിയുമായി ചർച്ച നടത്തി.
യശ്വന്തപുര ടെർമിനൽ നിർമാണത്തിൻ്റെ ഭാഗമായി ഒരു മാസക്കാലത്തേക്ക് യശ്വന്തപുര- കൊച്ചുവേളി ഗരീബ് രഥ് (12257/58) റദ്ദാക്കിയ തീരുമാനം പുനപരിശോധിക്കുമെന്ന് ഡിഒഎം ഉറപ്പ് നൽകിയതായി കെ.കെ.ടി.എഫ്. ഭാരവാഹികൾ ചര്‍ച്ചയ്ക്ക് ശേഷം പറഞ്ഞു. യശ്വന്തപുരയ്ക്ക് പകരം ചിക്കബാനവാര, ബാനസവാടി എന്നിവിടങ്ങളിൽ നിന്നും പുറപ്പെടുന്ന രീതിയിൽ താത്കാലികമായി സർവീസ് പുനസ്ഥാപിക്കണമെന്നായിരുന്നു കെ.കെ.ടി.എഫ് ആവശ്യപ്പെട്ടത്.
ഓണാവധിയോടനുബന്ധിച്ചുള്ള യാത്രാ തിരക്ക് പരിഗണിച്ച് എല്ലാവർഷവും ഏർപ്പെടുത്തുന്ന സ്പെഷ്യൽ ട്രെയിൻ വൈകി പ്രഖ്യാപിക്കുന്നതു കൊണ്ട് യാത്രക്കാർക്ക് പ്രയോജനം ലഭിക്കുന്നില്ലെന്നും ഇത്തവണ പ്രഖ്യാപനം നേരത്തെയാക്കണമെന്നും ഭാരവാഹികൾ ചർച്ചയിൽ ഉന്നയിച്ചു. ട്രെയിൻ സർവീസ് ഒരു മാസം മുമ്പേ പ്രഖ്യാപിക്കുന്നതിനുള്ള നടപടികൾ ആരംഭിച്ചതായി ഡിഒഎം ചര്‍ച്ചയില്‍ അറിയിച്ചു. ബെംഗളൂരുവിൽ നിന്നും കൊച്ചിയിലേക്കുള്ള വന്ദേഭാരത് രണ്ടു മാസത്തിനകം സർവീസ് ആരംഭിക്കാൻ കഴിയുമെന്ന് പ്രതീക്ഷിക്കുന്നതായും അദ്ദേഹം അറിയിച്ചു.
കെ.കെ.ടി.എഫ്. ചെയർമാൻ ആർ.വി. ആചാരി, ജനറൽ കൺവീനർ ആർ. മുരളീധർ, കോഡിനേറ്റർ മെറ്റി കെ. ഗ്രേസ്, ജേക്കബ് എന്നിവർ ചര്‍ച്ചയില്‍ പങ്കെടുത്തു.
<br>
TAGS : KKTF | RAILWAY | MALAYALI ORGANIZATION,
SUMMARY : Karnataka Kerala Travelers Forum held a discussion with Ranganath Reddy, Railway Divisional Operations Manager (DOM).
