മയക്കുമരുന്ന് കടത്ത്; അമ്മയ്ക്കും മകൾക്കുമെതിരെ കേസ്

ബെംഗളൂരു: വിദേശത്ത് നിന്നും ബെംഗളൂരുവിലേക്ക് മയക്കുമരുന്ന് കടത്ത് നടത്തിയ അമ്മയ്ക്കും മകൾക്കുമെതിരെ കേസെടുത്തു. ബെംഗളൂരു സ്വദേശി രഞ്ജനൊപ്പം ദുബായിൽ താമസിക്കുന്ന ലീന വീർവാണി, മകൾ നതാലിയ വീർവാണി എന്നിവർക്കെതിരെയാണ് കേസ്. യെലഹങ്ക സ്വദേശിയായ മുഹമ്മദിൻ്റെ പരാതിയുടെ അടിസ്ഥാനത്തിലാണ് കേസെടുത്തത്.

രഞ്ജനിലൂടെ ലീനയും നതാലിയയും തൻ്റെ 23-കാരനായ മകൻ അയാൻ മുഹമ്മദിനെ മയക്കുമരുന്നിന് അടിമയാക്കാൻ സമ്മർദ്ദം ചെലുത്തിയതായി മുഹമ്മദ്‌ പരാതിപ്പെടുകയായിരുന്നു. മകൻ്റെ പെട്ടെന്നുള്ള ലഹരി ആസക്തിയെക്കുറിച്ച് അന്വേഷിച്ചപ്പോഴാണ് മയക്കുമരുന്ന് റാക്കറ്റ് കണ്ടെത്തിയതെന്ന് മുഹമ്മദ്‌ പറഞ്ഞു.

അമ്മയും മകളും ദുബായിൽ നിന്ന് ബെംഗളൂരുവിലേക്ക് ഹൈഡ്രോ ഗഞ്ച, എംഡിഎംഎ ക്രിസ്റ്റൽ ഉൾപ്പെടെ വിവിധ മയക്കുമരുന്നുകൾ വിതരണം ചെയ്യുന്നതായി മുഹമ്മദ്‌ ആരോപിച്ചു. നതാലിയയാണ് പണമിടപാടുകൾ നടത്തുന്നത്. നഗരത്തിലെ വിദ്യാർഥികൾക്കും മറ്റ് ഇടപാടുകാർക്കും ഇവർ ലഹരിമരുന്നുകൾ വിതരണം ചെയ്യുകയും ചെയ്യുന്നുണ്ടെന്നും മുഹമ്മദ്‌ ആരോപിച്ചു. സംഭവത്തിൽ എൻഡിപിഎസ് ആക്ട് പ്രകാരം സിസിബി കേസെടുത്തു.

TAGS: BENGALURU UPDATES | DRUGS
SUMMARY: Mother daughter duo booked on drugs racket case