ബെംഗളൂരു: പ്രയാസങ്ങള് മാറാന് സമീപിച്ച ബെംഗളൂരു സ്വദേശിനിയെ ലൈംഗികമായി പീഡിപ്പിച്ചെന്ന പരാതിയില് തൃശൂര് പെരിങ്ങോട്ടുകരയിലെ ക്ഷേത്ര ജീവനക്കാരന് അറസ്റ്റില്. ടി.എ അരുണിനെ(40) ബെംഗളൂരു ബെല്ലന്തൂര് പോലീസാണ് അറസ്റ്റ് ചെയ്തത്. ക്ഷേത്രത്തിലെ അസിസ്റ്റന്റ് പൂജാരിയാണ് ഇയാളെന്ന് പോലീസ് പറഞ്ഞു.
ബെംഗളൂരുവില് സ്വകാര്യസ്ഥാപനത്തില് ജോലിചെയ്യുന്ന 38-കാരിയുടെ പരാതിയിലാണ് അറസ്റ്റ്. ഭര്ത്താവ് മരിച്ചതിനെത്തുടര്ന്ന് പ്രശ്നങ്ങള് മാറാന് വഴിതേടി ക്ഷേത്രത്തിലെത്തിയതായിരുന്നു യുവതി. ആരോ മന്ത്രവാദം ചെയ്തതാണ് പ്രശ്നകാരണമെന്നും ദുഷ്ടശക്തികളെ ഒഴിവാക്കാന് പൂജചെയ്യണമെന്നും അരുണ് ഉപദേശിച്ചു.
തുടര്ന്ന് യുവതിയുടെ ഫോണ് നമ്പര് കൈക്കലാക്കിയ ഇയാള് വീഡിയോ കോള് ചെയ്യുകയും പിന്നീട് ക്ഷേത്രം സന്ദര്ശിച്ചപ്പോള് ലൈംഗികമായി ഉപദ്രവിക്കുകയും ചെയ്തെന്ന് പരാതിയില് പറയുന്നു. ഇതിന്റെ വീഡിയോ പകര്ത്തുകയും ലൈംഗികാവശ്യത്തിനായി ഭീഷണിപ്പെടുത്തുകയും ചെയ്തു. യുവതിയുടെ രണ്ടുകുട്ടികള്ക്കെതിരേ മന്ത്രവാദം ചെയ്യുമെന്ന് ഭീഷണിപ്പെടുത്തിയെന്നും പരാതിയില് പറയുന്നു. ജൂണ് 13-നാണ് യുവതി ബെംഗളൂരു പോലീസില് പരാതി നല്കിയത്. തുടര്ന്നായിരുന്നു അറസ്റ്റ്.
SUMMARY: Temple employee arrested for raping a young woman who came to resolve the problem
