ബെംഗളൂരു: അനുവാദമില്ലാതെ സ്ത്രീകളുടെ ചിത്രങ്ങളും വീഡിയോദൃശ്യങ്ങളും പകർത്തി ഇൻസ്റ്റഗ്രാമിൽ പോസ്റ്റ് ചെയ്ത യുവാവ് അറസ്റ്റില്‍. ബെംഗളൂരുവിലെ കെആർ പുരത്ത്‌ താമസിക്കുന്ന ഗുർദീപ്‌സിങ് (26) ആണ് പിടിയിലായത്. ഹോട്ടൽ മാനേജ്‌മെന്റ് ബിരുദധാരിയായ ഇയാളെ ബനശങ്കരി പോലീസാണ് കസ്റ്റഡിയില്‍ എടുത്തത്. ഇയാളുടെ ഇൻസ്റ്റഗ്രാം പേജ് റദ്ദാക്കാനുള്ള നടപടികൾ സ്വീകരിച്ചതായി പോലീസ് അറിയിച്ചു.
നഗരത്തിലെ ഒരു വിദ്യാർഥിനിയുടെ വീഡിയോ വ്യാപകമായി പ്രചരിച്ചതിനെത്തുടർന്നാണ് നടപടി വന്നത്. തന്‍റെ ദൃശ്യങ്ങള്‍ അടങ്ങിയ വീഡിയോ പ്രചരിക്കുന്നതായി ചൂണ്ടിക്കാട്ടി വിദ്യാർഥിനി സാമൂഹികമാധ്യമത്തിൽ പരാതി പങ്കുവെക്കുകയായിരുന്നു. ചർച്ച് സ്ട്രീറ്റിൽനിന്നാണ് വിദ്യാർഥിനിയുടെ ദൃശ്യം ഇയാൾ പകർത്തിയത്. ദൃശ്യംകണ്ട് പലരും മോശം കമന്റുകൾ പങ്കുവെച്ചിരുന്നു.
SUMMARY: Man arrested for posting pictures and videos of women on Instagram
