ബെംഗളൂരു: നഗരത്തിലെ മലിനജല ശുദ്ധീകരണ പ്ലാന്റുകളിലെ (എസ്ടിപി) ജലം നാനോടെക്നോളജി ഉപയോഗിച്ച് ശുദ്ധീകരിക്കാൻ ബെംഗളൂരു ജല അതോറിറ്റി (ബിഡബ്ല്യുഎസ്എസ്ബി). വീട് വൃത്തിയാക്കുന്നത് ഉൾപ്പെടെ കൂടുതൽ ആവശ്യങ്ങൾക്കു എസ്ടിപിയിലെ ജലം ഉപയോഗിക്കാൻ ലക്ഷ്യമിട്ടാണിത്.
കുഴൽക്കിണർ, കാവേരി ജലം എന്നിവയുടെ ഉപയോഗം കുറയ്ക്കാനും ഇതു സഹായിക്കും. പരീക്ഷണാടിസ്ഥാനത്തിൽ ലാൽബാഗ് എസ്ടിപിയിലെ ജലം ഇത്തരത്തിൽ ശുദ്ധീകരിച്ചിരുന്നു. ഇതു വിജയം കണ്ടതോടെയാണ് പദ്ധതി വ്യാപിപ്പിക്കുന്നത്.
കഴിഞ്ഞ വേനൽക്കാലങ്ങളിൽ നഗരത്തിൽ കടുത്ത ജലക്ഷാമം അനുഭവപ്പെട്ടിരുന്നു. ഭൂഗർഭ ജലനിരപ്പ് ഗണ്യമായി ഇടിഞ്ഞതോടെയാണിത്. ഇതോടെ കുഴൽക്കിണറുകളുടെ അമിത ഉപയോഗം കുറയ്ക്കാനും നടപടികൾ ആരംഭിച്ചു. ഒപ്പം നിർമാണ മേഖലയിൽ നിന്നുൾപ്പെടെ എസ്ടിപിയിലെ ജലത്തിന് ആവശ്യക്കാരും വർധിച്ചിട്ടുണ്ട്.
SUMMARY: BWSSB plans to use nanotech to purify water from STPs in Bengaluru.
