ബെംഗളൂരു: ചിക്കമഗളൂരുവില്‍ ആറു വയസുകാരിയെ കൊന്ന പുള്ളിപുലിയെ പിടികൂടാനുള്ള ശ്രമത്തിനിടയില്‍ വനം വകുപ്പ് ഉദ്യോഗസ്ഥരെ ആക്രമിച്ചതിനെ തുടര്‍ന്ന് നടത്തിയ വെടിവെപ്പില്‍ പുള്ളി പുലി ചത്തു. തരിക്കരെ താലൂക്കിലെ ബൈരപുരയിലാണ് സംഭവം. എട്ട് വയസ്സുള്ള ആൺ പുള്ളിപ്പുലിയാണ് ചത്തത്. ‘പിടികൂടുന്നതിനിടെ പുള്ളിപ്പുലി പെട്ടെന്ന് ജീവനക്കാർക്ക് നേരെ ചാടി, സ്വയം രക്ഷിക്കാൻ വെടിവയ്ക്കുകയല്ലാതെ മറ്റ് മാർഗമില്ലായിരുന്നു’-വനംവകുപ്പ് ഉദ്യോഗസ്ഥർ പറഞ്ഞു. വെടിയേറ്റ പുലി സംഭവസ്ഥലത്ത് തന്നെ മരിച്ചു.
തരിക്കരെ മുണ്ട്രെയ്ക്ക് സമീപം സാൻവി (6) എന്ന പെണ്‍കുട്ടിയെ നവംബർ 20 ന് പുള്ളിപ്പുലി കൊന്നതിനെത്തുടർന്ന് വനം വകുപ്പ് പുള്ളിപ്പുലിയെ പിടികൂടാനുള്ള ഓപ്പറേഷൻ ആരംഭിച്ചിരുന്നു. പുള്ളിപുലിയെ പിടിക്കാൻ വകുപ്പ് പലയിടങ്ങളിലും കൂടുകൾ സ്ഥാപിച്ചിരുന്നു. ഇതിനിടയില്‍ നവംബർ 23 ന് നന്ദി ഗ്രാമത്തിലെ താമസക്കാരനായ രാജശേഖരപ്പ എന്ന ആളെയും നവംബർ 28 ന് ബൈരപുരയ്ക്ക് സമീപം 10 വയസ്സുള്ള ഹരീഷ് എന്ന ആണ്‍കുട്ടിയെയും പുള്ളിപ്പുലി ആക്രമിച്ചു. വനം മന്ത്രി ഈശ്വർ ബി. ഖന്ദ്രെ അടുത്തിടെ താലൂക്ക് സന്ദർശിക്കുകയും പുള്ളിപ്പുലിയെ പിടികൂടാൻ ഉദ്യോഗസ്ഥർക്ക് നിർദ്ദേശം നൽകുകയും ചെയ്തതിന്റെ അടിസ്ഥാനത്തിലാണ് ഉദ്യോഗസ്ഥര്‍ ഓപ്പറേഷൻ ആരംഭിച്ചത്.
SUMMARY: Violence during capture attempt; leopard shot dead in Chikkamagaluru
