‘അയാളെ ദൈവം ശിക്ഷിക്കും’; വിരമിക്കാൻ ഒരാഴ്ച ബാക്കി നിൽക്കെ മേലുദ്യോഗസ്ഥന്‍ പീഡപ്പിക്കുന്നതായി ആരോപിച്ച് സർക്കാർ ഉദ്യോഗസ്ഥന്‍ ജീവനൊടുക്കി

ബെംഗളൂരു:കർണാടകയിലെ തുമകുരു ജില്ലയിൽ മേലുദ്യോഗസ്ഥന്റെ പീഡനത്തെത്തുടർന്ന് സാമൂഹികക്ഷേമ വകുപ്പ് ഉദ്യോഗസ്ഥൻ ഓഫിസിനുള്ളിൽ തൂങ്ങിമരിച്ചു. പാവഗഡ സാമൂഹികക്ഷേമ വകുപ്പ് അസിസ്റ്റന്റ് ഡയറക്ടറായ മല്ലികാർജുൻ ആണ് മരിച്ചത്. വിരമിക്കാൻ ഒരാഴ്ച ബാക്കി നിൽക്കെയാണ് ആത്മഹത്യ ചെയ്തത്. തന്റെ മരണത്തിന്റെ പൂർണ ഉത്തരവാദി ജില്ല ഡയറക്ടറായ കൃഷ്ണപ്പയാണെന്ന് ആത്മഹത്യക്ക് മുമ്പ് സഹപ്രവർത്തകർക്ക് അയച്ച വിഡിയോയിൽ മല്ലികാർജുൻ ആരോപിച്ചു.

കൃഷ്ണപ്പ തന്നെ മാനസികമായി നിരന്തരം പീഡിപ്പിച്ചിരുന്നുവെന്നും നിയമവും ദൈവവും അയാള്‍ക്ക് അര്‍ഹമായ ശിക്ഷ നല്‍കുമെന്നും മല്ലികാര്‍ജുന്‍ വീഡിയോയില്‍ പറഞ്ഞു. ‘എന്‍റെ അമ്മയെയും ഭാര്യയെയും സഹായിക്കണമെന്ന് എനിക്കുണ്ടായിരുന്നു. അവര്‍ എന്നെ അത്രത്തോളം സ്നേഹിക്കുന്നു. എന്നാല്‍ എനിക്കതിന് കഴിഞ്ഞില്ല. എന്‍റെ മരണശേഷം കൃഷ്ണപ്പയുടെ കുടുംബത്തോട് പ്രതികാരം ചെയ്യരുത്. അവര്‍ ഇതില്‍ നിരപരാധികളാണ്’, മല്ലികാര്‍ജുന്‍ വീഡിയോയില്‍ വ്യക്തമാക്കി.

വെള്ളിയാഴ്ച വൈകുന്നേരമാണ് പാവഗഡയിലെ അപ്പ ബന്ദെ ഓഫീസിനുള്ളില്‍ മല്ലികാര്‍ജുനെ മരിച്ച നിലയില്‍ കണ്ടെത്തുന്നത്.
അതേസമയം ആരോപണങ്ങള്‍ കൃഷ്ണപ്പ നിഷേധിച്ചിട്ടുണ്ട്. സംഭവത്തില്‍ പാവഗഡ പോലീസ് അന്വേഷണം ആരംഭിച്ചിട്ടുണ്ട്
SUMMARY: A week before his retirement, a government official committed suicide