ബെംഗളൂരു: സ്വർണക്കടത്ത് കേസിൽ തന്നെ മനപൂർവം കുടുക്കിയതാണെന്ന് കന്നഡ നടി രന്യ റാവു. തനിക്ക് സ്വർണക്കടത്ത് റാക്കറ്റുമായി ബന്ധമില്ലെന്നും നടി അന്വേഷണ സംഘത്തെ അറിയിച്ചു. ശരീരത്തിൽ ഒളിപ്പിച്ച 12 കോടിയോളം വിലമതിക്കുന്ന സ്വർണക്കട്ടികളുമായി ബെംഗളൂരു വിമാനത്താവളത്തിൽ വെച്ചാണ് രന്യ ഡിആർഐയുടെ പിടിയിലാകുന്നത്.
ദുബായിലേക്ക് മാത്രമല്ല താൻ യാത്ര നടത്തിയിരുന്നതെന്നും യൂറോപ്യൻ രാജ്യങ്ങളിലേക്കും അമേരിക്കയിലേക്കും സൗദി അറേബ്യയിലേക്കും യാത്ര നടത്തിയതായും നടി വെളിപ്പെടുത്തി. തുടർച്ചയായി ദുബായ് സന്ദർശനം നടത്തിയതിനെത്തുടർന്നാണ് രന്യ ഡിആർഐയുടെ നിരീക്ഷണത്തിൽ അകപ്പെടുന്നത്. കഴിഞ്ഞ ഒരു വർഷത്തിനിടെ രന്യ 30 ഓളം തവണ ദുബായ് സന്ദർശനം നടത്തിയെന്നാണ് വിവരം.
15 ദിവസത്തിനിടെ നാലു തവണ ദുബായ് സന്ദർശനം നടത്തുകയും ഒരേ വസ്ത്രം ധരിച്ചു തന്നെ യാത്രകൾ നടത്തിയതുമാണ് രന്യ അറസ്റ്റിലാകാൻ കാരണം. ഓരോ ദുബായ് യാത്രകളിലും കിലോ കണക്കിന് സ്വർണം കടത്തിയിരുന്ന രന്യ പ്രോട്ടോക്കോൾ സംരക്ഷണം ദുരുപയോഗം ചെയ്തതായും അന്വേഷണ സംഘം കണ്ടെത്തിയിരുന്നു.
ചെന്നൈയിൽ 2024-ൽ നടന്ന സ്വർണക്കടത്തുമായി രന്യയുടെ കേസിന് ബന്ധമുണ്ടോയെന്നും ഡിആർഐ പരിശോധിക്കുന്നുണ്ട്. രന്യയുടെ ബാങ്ക് അക്കൗണ്ടുകൾ കേന്ദ്രീകരിച്ചുള്ള വിവരങ്ങളും അന്വേഷണ സംഘം ശേഖരിച്ചുവരികയാണ്.
TAGS: BENGALURU
SUMMARY: Ranya Rao broke down during questioning, claimed she was trapped
