ബെംഗളൂരു: ബെംഗളൂരു മലയാളി ഫോറം മലയാള മനോരമയുമായി ചേർന്നു സംഘടിപ്പിക്കുന്ന ‘ഓണാരവം –2026’ സെപ്റ്റംബര്‍ 6ന് നടക്കും. കോറമംഗലയിലെ സെന്റ് ജോൺസ് ഓഡിറ്റോറിയത്തിൽ രാവിലെ 9ന് പൂക്കള മത്സരത്തോടെയാണ് ആഘോഷ പരിപാടികള്‍ക്ക് തുടക്കം കുറിക്കുന്നത്. തുടര്‍ന്നു വിവിധ കലാപരിപാടികള്‍ അരങ്ങേറും.
ഉച്ചയ്ക്ക് 2.30ന് നടക്കുന്ന പൊതുസമ്മേളനത്തിൽ കേന്ദ്രമന്ത്രി ശോഭ കരന്തലാജെ മുഖ്യാതിഥിയായിരിക്കും. വനംമന്ത്രി രാമലിംഗ റെഡ്ഡി, എംഎൽഎമാരായ മാത്യു കുഴൽനാടൻ, സി.കെ.രാമമൂർത്തി, സെന്റ് ജോൺസ് നാഷനൽ അക്കാദമി ഓഫ് ഹെൽത്ത് സയൻസ് ഫിനാൻസ് അസോഷ്യേറ്റ് ഡയറക്ടർ ഫാ.എ.ജെ.ടോണി, ചലച്ചിത്ര നടി അംബിക, നടൻ സാജു നവോദയ എന്നിവരും സന്നിഹിതരായിരിക്കും. സഹൽ അവതരിപ്പിക്കുന്ന ബബിൾ ഷോ, പിന്നണി ഗായകരായ അഫ്സൽ, അഖില ആനന്ദ് എന്നിവരുടെ സംഗീതനിശ എന്നിവ ഉണ്ടായിരിക്കും.
