ബെംഗളൂരു: കളിപ്പാട്ടങ്ങൾ നിർമ്മിക്കുകയും വിതരണം ചെയ്യുകയും ചെയ്യുന്ന മാരുതി ഇൻ്റർനാഷണലിൻ്റെ ഓഫിസുകളിൽ റെയ്ഡ് നടത്തി ബ്യൂറോ ഓഫ് ഇന്ത്യൻ സ്റ്റാൻഡേർഡ്സിൻ്റെ (ബിഐഎസ്) ബെംഗളൂരു ബ്രാഞ്ച് ഉദ്യോഗസ്ഥ സംഘം. ലൈസൻസ് വ്യവസ്ഥ ലംഘിച്ചെന്നാരോപിച്ചാണ് റെയ്ഡ് നടന്നത്. മാരുതി ഇൻ്റർനാഷണലിൻ്റെ ബെംഗളൂരുവിലെ മൂന്ന് ഓഫിസുകളിലായിരുന്നു റെയ്ഡ്.
കമ്പനിക്ക് ഇന്ത്യൻ മാനദണ്ഡങ്ങൾക്കനുസൃതമായി സോഫ്റ്റ് കളിപ്പാട്ടങ്ങൾ നിർമ്മിക്കാനും വിതരണം ചെയ്യാനും ലൈസൻസ് ഉണ്ട്. കമ്പനി കളിപ്പാട്ടങ്ങളിൽ ബിഐഎസ് മാർക്ക് (ഐഎസ്ഐ മാർക്ക്) ഉപയോഗിക്കുന്നുമുണ്ട്. എന്നാൽ, സ്ഥാപനം മൂന്ന് സ്ഥലങ്ങളിൽ നിന്ന് വിൽക്കുന്ന ഐഎസ്ഐ മുദ്രയുള്ള ഉൽപ്പന്നങ്ങളിൽ മെയ്ഡ് ഇൻ ചൈന എന്നെഴുതിയിട്ടുണ്ടെന്ന് അടുത്തിടെ പരാതി ഉയർന്നിരുന്നു.
ഇതേതുടർന്നായിരുന്നു ഉദ്യോഗസ്ഥർ പരിശോധന നടത്തിയത്. ബിഐഎസ് ലൈസൻസ് ഇല്ലാതെ മെയ്ഡ് ഇൻ ചൈന എന്നെഴുതിയ കുറച്ച് കളിപ്പാട്ടങ്ങളും പരിശോധനയിൽ കണ്ടെത്തിയതായി ബിഐഎസ് ഉദ്യോഗസ്ഥർ പറഞ്ഞു. മൂന്ന് ഓഫിസുകളിൽ നിന്നാതി 35,000 കളിപ്പാട്ടങ്ങളും പോളിസ്റ്റർ സ്റ്റേപ്പിൾസ് ഫൈബറിൻ്റെ ആറോളം പൊതികളും പിടിച്ചെടുത്തിട്ടുമുണ്ട്.
TAGS: BENGALURU UPDATES, KARNATAKA
KEYWORDS: BIS officers raid bangalore branch of maruti international
