ബെംഗളൂരു: പുലർച്ചെ ജോലികഴിഞ്ഞ് മടങ്ങുകയായിരുന്ന ഡെലിവറി ജീവനക്കാരന് നേരെ ആക്രമണം. നഗരത്തില് പഠനത്തോടൊപ്പം ക്വിക് കൊമേഴ്സ് ഡെലിവറി സ്ഥാപനത്തിൽ ജോലി ചെയ്തുവന്ന ബസവരാജ് എന്ന യുവാവിനാണ് മർദനമേറ്റത്.
യെലഹങ്ക ന്യൂ ടൗണിൽ പുലർച്ചെ 4.40ഓടെയാണ് സംഭവം. ന്യൂ ടൗണിലെ ഫോർത്ത് മെയിനിൽ നിന്ന് സന്തോഷ് നഗറിലേക്ക് ഡെലിവറി പൂർത്തിയാക്കി മടങ്ങുകയായിരുന്നു ബസവരാജ്. ഇതിനിടെ റോഡിലൂടെ നടന്നുപോയ ഒരു സംഘം പെൺകുട്ടികൾ ബസവരാജിനെ ആക്ഷേപിക്കാൻ തുടങ്ങിയെന്നാണ് പരാതിയില് പറയുന്നത്. തുടർന്ന് വാക്കുതർക്കമുണ്ടാകുകയും സംഭവം കൈയാങ്കളിയിലേക്ക് നീങ്ങുകയുമായിരുന്നു. സംഘത്തിലുണ്ടായിരുന്നവർ ബസവരാജിനെ ആക്രമിക്കുകയും മരക്കഷണം ഉപയോഗിച്ച് മർദിക്കുകയും ചെയ്തതായി പരാതിയിൽ പറയുന്നു. ആക്രമണത്തിൽ ബസവരാജിന് പരുക്കേറ്റു.
സംഭവത്തിന് പിന്നാലെ ബസവരാജ് പോലീസിൽ പരാതി നൽകി. പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത പോലീസ് അന്വേഷണം ആരംഭിച്ചു.
സംഭവസ്ഥലത്തെയും സമീപ പ്രദേശങ്ങളിലെയും സിസിടിവി ദൃശ്യങ്ങൾ പോലീസ് പരിശോധിച്ചുവരികയാണ്. ആക്രമണത്തിന് പിന്നിലെ കൃത്യമായ കാരണം എന്താണെന്നും സംഭവത്തിൽ ഉൾപ്പെട്ടവരുടെ പങ്കെന്താണെന്നും കണ്ടെത്താനുള്ള ശ്രമത്തിലാണ് അന്വേഷണസംഘം.
SUMMARY: Delivery worker attacked while returning from work
